Eze 35:1 א ויהי דבר יהוה אלי לאמר
Eze 35:2 ב בן אדם שים פניך על הר שעיר והנבא עליו
Eze 35:3 ג ואמרת לו כה אמר אדני יהוה הנני אליך הר שעיר ונטיתי ידי עליך ונתתיך שממה ומשמה
Eze 35:4 ד עריך חרבה אשים ואתה שממה תהיה וידעת כי אני יהוה
Eze 35:5 ה יען היות לך איבת עולם ותגר את בני ישראל על ידי חרב--בעת אידם בעת עון קץ
Eze 35:6 ו לכן חי אני נאם אדני יהוה כי לדם אעשך ודם ירדפך אם לא דם שנאת ודם ירדפך
Eze 35:7 ז ונתתי את הר שעיר לשממה ושממה והכרתי ממנו עבר ושב
Eze 35:8 ח ומלאתי את הריו חלליו גבעותיך וגיאותיך וכל אפיקיך חללי חרב יפלו בהם
Eze 35:9 ט שממות עולם אתנך ועריך לא תישבנה (תשובנה) וידעתם כי אני יהוה
Eze 35:10 י יען אמרך את שני הגוים ואת שתי הארצות לי תהיינה--וירשנוה ויהוה שם היה  {ס}
Eze 35:11 יא לכן חי אני נאם אדני יהוה ועשיתי כאפך וכקנאתך אשר עשיתה משנאתיך בם ונודעתי בם כאשר אשפטך
Eze 35:12 יב וידעת כי אני יהוה שמעתי את כל נאצותיך אשר אמרת על הרי ישראל לאמר שממה (שממו)  לנו נתנו לאכלה
Eze 35:13 יג ותגדילו עלי בפיכם והעתרתם עלי דבריכם  אני שמעתי  {ס}
Eze 35:14 יד כה אמר אדני יהוה  כשמח כל הארץ שממה אעשה לך
Eze 35:15 טו כשמחתך לנחלת בית ישראל על אשר שממה--כן אעשה לך  שממה תהיה הר שעיר וכל אדום כלה וידעו כי אני יהוה  {פ}