Eze 7:1 א ויהי דבר יהוה אלי לאמר
Eze 7:2 ב ואתה בן אדם כה אמר אדני יהוה לאדמת ישראל--קץ  בא הקץ על ארבעת (ארבע) כנפות הארץ
Eze 7:3 ג עתה הקץ עליך ושלחתי אפי בך ושפטתיך כדרכיך ונתתי עליך את כל תועבותיך
Eze 7:4 ד ולא תחוס עיני עליך ולא אחמול  כי דרכיך עליך אתן ותועבותיך בתוכך תהיין וידעתם כי אני יהוה  {פ}
Eze 7:5 ה כה אמר אדני יהוה  רעה אחת רעה הנה באה
Eze 7:6 ו קץ בא בא הקץ הקיץ אליך הנה באה
Eze 7:7 ז באה הצפירה אליך יושב הארץ בא העת קרוב היום מהומה--ולא הד הרים
Eze 7:8 ח עתה מקרוב אשפוך חמתי עליך וכליתי אפי בך ושפטתיך כדרכיך ונתתי עליך את כל תועבותיך
Eze 7:9 ט ולא תחוס עיני ולא אחמול  כדרכיך עליך אתן ותועבותיך בתוכך תהיין וידעתם כי אני יהוה מכה
Eze 7:10 י הנה היום הנה באה  יצאה הצפרה--צץ המטה פרח הזדון
Eze 7:11 יא החמס קם למטה רשע לא מהם ולא מהמונם ולא מהמהם--ולא נה בהם
Eze 7:12 יב בא העת הגיע היום--הקונה אל ישמח והמכר אל יתאבל  כי חרון אל כל המונה
Eze 7:13 יג כי המכר אל הממכר לא ישוב ועוד בחיים חיתם  כי חזון אל כל המונה לא ישוב ואיש בעונו חיתו לא יתחזקו
Eze 7:14 יד תקעו בתקוע והכין הכל ואין הלך למלחמה  כי חרוני אל כל המונה
Eze 7:15 טו החרב בחוץ והדבר והרעב מבית  אשר בשדה בחרב ימות ואשר בעיר רעב ודבר יאכלנו
Eze 7:16 טז ופלטו פליטיהם והיו אל ההרים כיוני הגאיות כלם המות--איש בעונו
Eze 7:17 יז כל הידים תרפינה וכל ברכים תלכנה מים
Eze 7:18 יח וחגרו שקים וכסתה אותם פלצות ואל כל פנים בושה ובכל ראשיהם קרחה
Eze 7:19 יט כספם בחוצות ישליכו וזהבם לנדה יהיה--כספם וזהבם לא יוכל להצילם ביום עברת יהוה נפשם לא ישבעו ומעיהם לא ימלאו  כי מכשול עונם היה
Eze 7:20 כ וצבי עדיו לגאון שמהו וצלמי תועבתם שקוציהם עשו בו על כן נתתיו להם לנדה
Eze 7:21 כא ונתתיו ביד הזרים לבז ולרשעי הארץ לשלל וחללוה (וחללוהו)
Eze 7:22 כב והסבותי פני מהם וחללו את צפוני ובאו בה פריצים וחללוה  {פ}
Eze 7:23 כג עשה הרתוק  כי הארץ מלאה משפט דמים והעיר מלאה חמס
Eze 7:24 כד והבאתי רעי גוים וירשו את בתיהם והשבתי גאון עזים ונחלו מקדשיהם
Eze 7:25 כה קפדה בא ובקשו שלום ואין
Eze 7:26 כו הוה על הוה תבוא ושמעה אל שמועה תהיה ובקשו חזון מנביא--ותורה תאבד מכהן ועצה מזקנים
Eze 7:27 כז המלך יתאבל ונשיא ילבש שממה וידי עם הארץ תבהלנה מדרכם אעשה אתם ובמשפטיהם אשפטם וידעו כי אני יהוה  {פ}