Eze 19:1 א ואתה שא קינה אל נשיאי ישראל
Eze 19:2 ב ואמרת מה אמך לביא בין אריות רבצה בתוך כפרים רבתה גוריה
Eze 19:3 ג ותעל אחד מגריה כפיר היה וילמד לטרף טרף אדם אכל
Eze 19:4 ד וישמעו אליו גוים בשחתם נתפש ויבאהו בחחים אל ארץ מצרים
Eze 19:5 ה ותרא כי נוחלה אבדה תקותה ותקח אחד מגריה כפיר שמתהו
Eze 19:6 ו ויתהלך בתוך אריות כפיר היה וילמד לטרף טרף אדם אכל
Eze 19:7 ז וידע אלמנותיו ועריהם החריב ותשם ארץ ומלאה מקול שאגתו
Eze 19:8 ח ויתנו עליו גוים סביב ממדינות ויפרשו עליו רשתם בשחתם נתפש
Eze 19:9 ט ויתנהו בסוגר בחחים ויבאהו אל מלך בבל יבאהו במצדות למען לא ישמע קולו עוד אל הרי ישראל  {פ}
Eze 19:10 י אמך כגפן בדמך על מים שתולה פריה וענפה היתה ממים רבים
Eze 19:11 יא ויהיו לה מטות עז אל שבטי משלים ותגבה קומתו על בין עבתים וירא בגבהו ברב דליתיו
Eze 19:12 יב ותתש בחמה לארץ השלכה ורוח הקדים הוביש פריה התפרקו ויבשו מטה עזה אש אכלתהו
Eze 19:13 יג ועתה שתולה במדבר בארץ ציה וצמא
Eze 19:14 יד ותצא אש ממטה בדיה פריה אכלה ולא היה בה מטה עז שבט למשול  קינה היא ותהי לקינה  {פ}