Eze 10:1 א ואראה והנה אל הרקיע אשר על ראש הכרבים כאבן ספיר כמראה דמות כסא--נראה עליהם
Eze 10:2 ב ויאמר אל האיש לבש הבדים ויאמר בא אל בינות לגלגל אל תחת לכרוב ומלא חפניך גחלי אש מבינות לכרבים וזרק על העיר ויבא לעיני
Eze 10:3 ג והכרבים עמדים מימין לבית--בבאו האיש והענן מלא את החצר הפנימית
Eze 10:4 ד וירם כבוד יהוה מעל הכרוב על מפתן הבית וימלא הבית את הענן והחצר מלאה את נגה כבוד יהוה
Eze 10:5 ה וקול כנפי הכרובים--נשמע עד החצר החיצנה  כקול אל שדי בדברו
Eze 10:6 ו ויהי בצותו את האיש לבש הבדים לאמר קח אש מבינות לגלגל מבינות לכרובים ויבא ויעמד אצל האופן
Eze 10:7 ז וישלח הכרוב את ידו מבינות לכרובים אל האש אשר בינות הכרבים וישא ויתן אל חפני לבש הבדים ויקח ויצא
Eze 10:8 ח וירא לכרבים--תבנית יד אדם תחת כנפיהם
Eze 10:9 ט ואראה והנה ארבעה אופנים אצל הכרובים--אופן אחד אצל הכרוב אחד ואופן אחד אצל הכרוב אחד ומראה האופנים כעין אבן תרשיש
Eze 10:10 י ומראיהם--דמות אחד לארבעתם  כאשר יהיה האופן בתוך האופן
Eze 10:11 יא בלכתם אל ארבעת רבעיהם ילכו--לא יסבו בלכתם  כי המקום אשר יפנה הראש אחריו ילכו--לא יסבו בלכתם
Eze 10:12 יב וכל בשרם וגבהם וידיהם וכנפיהם--והאופנים מלאים עינים סביב לארבעתם אופניהם
Eze 10:13 יג לאופנים--להם קורא הגלגל באזני
Eze 10:14 יד וארבעה פנים לאחד  פני האחד פני הכרוב ופני השני פני אדם והשלישי פני אריה והרביעי פני נשר
Eze 10:15 טו וירמו הכרובים--היא החיה אשר ראיתי בנהר כבר
Eze 10:16 טז ובלכת הכרובים ילכו האופנים אצלם ובשאת הכרובים את כנפיהם לרום מעל הארץ לא יסבו האופנים גם הם מאצלם
Eze 10:17 יז בעמדם יעמדו וברומם ירומו אותם  כי רוח החיה בהם
Eze 10:18 יח ויצא כבוד יהוה מעל מפתן הבית ויעמד על הכרובים
Eze 10:19 יט וישאו הכרובים את כנפיהם וירומו מן הארץ לעיני בצאתם והאופנים לעמתם ויעמד פתח שער בית יהוה הקדמוני וכבוד אלהי ישראל עליהם מלמעלה
Eze 10:20 כ היא החיה אשר ראיתי תחת אלהי ישראל--בנהר כבר ואדע כי כרובים המה
Eze 10:21 כא ארבעה ארבעה פנים לאחד וארבע כנפים לאחד ודמות ידי אדם תחת כנפיהם
Eze 10:22 כב ודמות פניהם--המה הפנים אשר ראיתי על נהר כבר מראיהם ואותם איש אל עבר פניו ילכו