Psa 119:1 א  אשרי תמימי-דרך--    ההלכים בתורת יהוה
Psa 119:2 ב  אשרי נצרי עדתיו    בכל-לב ידרשוהו
Psa 119:3 ג  אף לא-פעלו עולה    בדרכיו הלכו
Psa 119:4 ד  אתה צויתה פקדיך--    לשמר מאד
Psa 119:5 ה  אחלי יכנו דרכי--    לשמר חקיך
Psa 119:6 ו  אז לא-אבוש--    בהביטי אל-כל-מצותיך
Psa 119:7 ז  אודך בישר לבב--    בלמדי משפטי צדקך
Psa 119:8 ח  את-חקיך אשמר    אל-תעזבני עד-מאד
Psa 119:9 ט  במה יזכה-נער את-ארחו--    לשמר כדברך
Psa 119:10 י  בכל-לבי דרשתיך    אל-תשגני ממצותיך
Psa 119:11 יא  בלבי צפנתי אמרתך--    למען לא אחטא-לך
Psa 119:12 יב  ברוך אתה יהוה--    למדני חקיך
Psa 119:13 יג  בשפתי ספרתי--    כל משפטי-פיך
Psa 119:14 יד  בדרך עדותיך ששתי--    כעל כל-הון
Psa 119:15 טו  בפקודיך אשיחה    ואביטה ארחתיך
Psa 119:16 טז  בחקתיך אשתעשע    לא אשכח דברך
Psa 119:17 יז  גמל על-עבדך אחיה    ואשמרה דברך
Psa 119:18 יח  גל-עיני ואביטה--    נפלאות מתורתך
Psa 119:19 יט  גר אנכי בארץ    אל-תסתר ממני מצותיך
Psa 119:20 כ  גרסה נפשי לתאבה--    אל-משפטיך בכל-עת
Psa 119:21 כא  גערת זדים ארורים--    השגים ממצותיך
Psa 119:22 כב  גל מעלי חרפה ובוז    כי עדתיך נצרתי
Psa 119:23 כג  גם ישבו שרים בי נדברו--    עבדך ישיח בחקיך
Psa 119:24 כד  גם-עדתיך שעשעי--    אנשי עצתי
Psa 119:25 כה  דבקה לעפר נפשי    חיני כדברך
Psa 119:26 כו  דרכי ספרתי ותענני    למדני חקיך
Psa 119:27 כז  דרך-פקודיך הבינני    ואשיחה בנפלאותיך
Psa 119:28 כח  דלפה נפשי מתוגה    קימני כדברך
Psa 119:29 כט  דרך-שקר הסר ממני    ותורתך חנני
Psa 119:30 ל  דרך-אמונה בחרתי    משפטיך שויתי
Psa 119:31 לא  דבקתי בעדותיך    יהוה אל-תבישני
Psa 119:32 לב  דרך-מצותיך ארוץ    כי תרחיב לבי
Psa 119:33 לג  הורני יהוה דרך חקיך    ואצרנה עקב
Psa 119:34 לד  הבינני ואצרה תורתך    ואשמרנה בכל-לב
Psa 119:35 לה  הדריכני בנתיב מצותיך    כי-בו חפצתי
Psa 119:36 לו  הט-לבי אל-עדותיך    ואל אל-בצע
Psa 119:37 לז  העבר עיני מראות שוא    בדרכך חיני
Psa 119:38 לח  הקם לעבדך אמרתך--    אשר ליראתך
Psa 119:39 לט  העבר חרפתי אשר יגרתי    כי משפטיך טובים
Psa 119:40 מ  הנה תאבתי לפקדיך    בצדקתך חיני
Psa 119:41 מא  ויבאני חסדך יהוה    תשועתך כאמרתך
Psa 119:42 מב  ואענה חרפי דבר    כי-בטחתי בדברך
Psa 119:43 מג  ואל-תצל מפי דבר-אמת עד-מאד    כי למשפטך יחלתי
Psa 119:44 מד  ואשמרה תורתך תמיד--    לעולם ועד
Psa 119:45 מה  ואתהלכה ברחבה    כי פקדיך דרשתי
Psa 119:46 מו  ואדברה בעדתיך נגד מלכים    ולא אבוש
Psa 119:47 מז  ואשתעשע במצותיך    אשר אהבתי
Psa 119:48 מח  ואשא-כפי--אל-מצותיך אשר אהבתי    ואשיחה בחקיך
Psa 119:49 מט  זכר-דבר לעבדך--    על אשר יחלתני
Psa 119:50 נ  זאת נחמתי בעניי    כי אמרתך חיתני
Psa 119:51 נא  זדים הליצני עד-מאד    מתורתך לא נטיתי
Psa 119:52 נב  זכרתי משפטיך מעולם יהוה    ואתנחם
Psa 119:53 נג  זלעפה אחזתני מרשעים--    עזבי תורתך
Psa 119:54 נד  זמרות היו-לי חקיך--    בבית מגורי
Psa 119:55 נה  זכרתי בלילה שמך יהוה    ואשמרה תורתך
Psa 119:56 נו  זאת היתה-לי    כי פקדיך נצרתי
Psa 119:57 נז  חלקי יהוה אמרתי--    לשמר דבריך
Psa 119:58 נח  חליתי פניך בכל-לב    חנני כאמרתך
Psa 119:59 נט  חשבתי דרכי    ואשיבה רגלי אל-עדתיך
Psa 119:60 ס  חשתי ולא התמהמהתי--    לשמר מצותיך
Psa 119:61 סא  חבלי רשעים עודני    תורתך לא שכחתי
Psa 119:62 סב  חצות-לילה--אקום להודות לך    על משפטי צדקך
Psa 119:63 סג  חבר אני לכל-אשר יראוך    ולשמרי פקודיך
Psa 119:64 סד  חסדך יהוה מלאה הארץ    חקיך למדני
Psa 119:65 סה  טוב עשית עם-עבדך--    יהוה כדברך
Psa 119:66 סו  טוב טעם ודעת למדני    כי במצותיך האמנתי
Psa 119:67 סז  טרם אענה אני שגג    ועתה אמרתך שמרתי
Psa 119:68 סח  טוב-אתה ומטיב    למדני חקיך
Psa 119:69 סט  טפלו עלי שקר זדים    אני בכל-לב אצר פקודיך
Psa 119:70 ע  טפש כחלב לבם    אני תורתך שעשעתי
Psa 119:71 עא  טוב-לי כי-עניתי--    למען אלמד חקיך
Psa 119:72 עב  טוב-לי תורת-פיך--    מאלפי זהב וכסף
Psa 119:73 עג  ידיך עשוני ויכוננוני    הבינני ואלמדה מצותיך
Psa 119:74 עד  יראיך יראוני וישמחו    כי לדברך יחלתי
Psa 119:75 עה  ידעתי יהוה כי-צדק משפטיך    ואמונה עניתני
Psa 119:76 עו  יהי-נא חסדך לנחמני--    כאמרתך לעבדך
Psa 119:77 עז  יבאוני רחמיך ואחיה    כי-תורתך שעשעי
Psa 119:78 עח  יבשו זדים כי-שקר עותוני    אני אשיח בפקודיך
Psa 119:79 עט  ישובו לי יראיך    וידעו (וידעי) עדתיך
Psa 119:80 פ  יהי-לבי תמים בחקיך--    למען לא אבוש
Psa 119:81 פא  כלתה לתשועתך נפשי    לדברך יחלתי
Psa 119:82 פב  כלו עיני לאמרתך--    לאמר מתי תנחמני
Psa 119:83 פג  כי-הייתי כנאד בקיטור--    חקיך לא שכחתי
Psa 119:84 פד  כמה ימי-עבדך    מתי תעשה ברדפי משפט
Psa 119:85 פה  כרו-לי זדים שיחות--    אשר לא כתורתך
Psa 119:86 פו  כל-מצותיך אמונה    שקר רדפוני עזרני
Psa 119:87 פז  כמעט כלוני בארץ    ואני לא-עזבתי פקדיך
Psa 119:88 פח  כחסדך חיני    ואשמרה עדות פיך
Psa 119:89 פט  לעולם יהוה--    דברך נצב בשמים
Psa 119:90 צ  לדר ודר אמונתך    כוננת ארץ ותעמד
Psa 119:91 צא  למשפטיך עמדו היום    כי הכל עבדיך
Psa 119:92 צב  לולי תורתך שעשעי--    אז אבדתי בעניי
Psa 119:93 צג  לעולם לא-אשכח פקודיך    כי בם חייתני
Psa 119:94 צד  לך-אני הושיעני    כי פקודיך דרשתי
Psa 119:95 צה  לי קוו רשעים לאבדני    עדתיך אתבונן
Psa 119:96 צו  לכל-תכלה ראיתי קץ    רחבה מצותך מאד
Psa 119:97 צז  מה-אהבתי תורתך    כל-היום היא שיחתי
Psa 119:98 צח  מאיבי תחכמני מצותך    כי לעולם היא-לי
Psa 119:99 צט  מכל-מלמדי השכלתי    כי עדותיך שיחה לי
Psa 119:100 ק  מזקנים אתבונן    כי פקודיך נצרתי
Psa 119:101 קא  מכל-ארח רע כלאתי רגלי--    למען אשמר דברך
Psa 119:102 קב  ממשפטיך לא-סרתי    כי-אתה הורתני
Psa 119:103 קג  מה-נמלצו לחכי אמרתך--    מדבש לפי
Psa 119:104 קד  מפקודיך אתבונן    על כן שנאתי כל-ארח שקר
Psa 119:105 קה  נר-לרגלי דברך    ואור לנתיבתי
Psa 119:106 קו  נשבעתי ואקימה--    לשמר משפטי צדקך
Psa 119:107 קז  נעניתי עד-מאד    יהוה חיני כדברך
Psa 119:108 קח  נדבות פי רצה-נא יהוה    ומשפטיך למדני
Psa 119:109 קט  נפשי בכפי תמיד    ותורתך לא שכחתי
Psa 119:110 קי  נתנו רשעים פח לי    ומפקודיך לא תעיתי
Psa 119:111 קיא  נחלתי עדותיך לעולם    כי-ששון לבי המה
Psa 119:112 קיב  נטיתי לבי לעשות חקיך--    לעולם עקב
Psa 119:113 קיג  סעפים שנאתי    ותורתך אהבתי
Psa 119:114 קיד  סתרי ומגני אתה    לדברך יחלתי
Psa 119:115 קטו  סורו-ממני מרעים    ואצרה מצות אלהי
Psa 119:116 קטז  סמכני כאמרתך ואחיה    ואל-תבישני משברי
Psa 119:117 קיז  סעדני ואושעה    ואשעה בחקיך תמיד
Psa 119:118 קיח  סלית כל-שוגים מחקיך    כי-שקר תרמיתם
Psa 119:119 קיט  סגים--השבת כל-רשעי-ארץ    לכן אהבתי עדתיך
Psa 119:120 קכ  סמר מפחדך בשרי    וממשפטיך יראתי
Psa 119:121 קכא  עשיתי משפט וצדק    בל-תניחני לעשקי
Psa 119:122 קכב  ערב עבדך לטוב    אל-יעשקני זדים
Psa 119:123 קכג  עיני כלו לישועתך    ולאמרת צדקך
Psa 119:124 קכד  עשה עם-עבדך כחסדך    וחקיך למדני
Psa 119:125 קכה  עבדך-אני הבינני    ואדעה עדתיך
Psa 119:126 קכו  עת לעשות ליהוה--    הפרו תורתך
Psa 119:127 קכז  על-כן אהבתי מצותיך--    מזהב ומפז
Psa 119:128 קכח  על-כן כל-פקודי כל ישרתי    כל-ארח שקר שנאתי
Psa 119:129 קכט  פלאות עדותיך    על-כן נצרתם נפשי
Psa 119:130 קל  פתח דבריך יאיר    מבין פתיים
Psa 119:131 קלא  פי-פערתי ואשאפה    כי למצותיך יאבתי
Psa 119:132 קלב  פנה-אלי וחנני--    כמשפט לאהבי שמך
Psa 119:133 קלג  פעמי הכן באמרתך    ואל-תשלט-בי כל-און
Psa 119:134 קלד  פדני מעשק אדם    ואשמרה פקודיך
Psa 119:135 קלה  פניך האר בעבדך    ולמדני את-חקיך
Psa 119:136 קלו  פלגי-מים ירדו עיני--    על לא-שמרו תורתך
Psa 119:137 קלז  צדיק אתה יהוה    וישר משפטיך
Psa 119:138 קלח  צוית צדק עדתיך    ואמונה מאד
Psa 119:139 קלט  צמתתני קנאתי    כי-שכחו דבריך צרי
Psa 119:140 קמ  צרופה אמרתך מאד    ועבדך אהבה
Psa 119:141 קמא  צעיר אנכי ונבזה    פקדיך לא שכחתי
Psa 119:142 קמב  צדקתך צדק לעולם    ותורתך אמת
Psa 119:143 קמג  צר-ומצוק מצאוני    מצותיך שעשעי
Psa 119:144 קמד  צדק עדותיך לעולם    הבינני ואחיה
Psa 119:145 קמה  קראתי בכל-לב ענני יהוה    חקיך אצרה
Psa 119:146 קמו  קראתיך הושיעני    ואשמרה עדתיך
Psa 119:147 קמז  קדמתי בנשף ואשועה    לדבריך (לדברך) יחלתי
Psa 119:148 קמח  קדמו עיני אשמרות--    לשיח באמרתך
Psa 119:149 קמט  קולי שמעה כחסדך    יהוה כמשפטך חיני
Psa 119:150 קנ  קרבו רדפי זמה    מתורתך רחקו
Psa 119:151 קנא  קרוב אתה יהוה    וכל-מצותיך אמת
Psa 119:152 קנב  קדם ידעתי מעדתיך    כי לעולם יסדתם
Psa 119:153 קנג  ראה-עניי וחלצני    כי-תורתך לא שכחתי
Psa 119:154 קנד  ריבה ריבי וגאלני    לאמרתך חיני
Psa 119:155 קנה  רחוק מרשעים ישועה    כי חקיך לא דרשו
Psa 119:156 קנו  רחמיך רבים יהוה    כמשפטיך חיני
Psa 119:157 קנז  רבים רדפי וצרי    מעדותיך לא נטיתי
Psa 119:158 קנח  ראיתי בגדים ואתקוטטה--    אשר אמרתך לא שמרו
Psa 119:159 קנט  ראה כי-פקודיך אהבתי    יהוה כחסדך חיני
Psa 119:160 קס  ראש-דברך אמת    ולעולם כל-משפט צדקך
Psa 119:161 קסא  שרים רדפוני חנם    ומדבריך (ומדברך) פחד לבי
Psa 119:162 קסב  שש אנכי על-אמרתך--    כמוצא שלל רב
Psa 119:163 קסג  שקר שנאתי ואתעבה    תורתך אהבתי
Psa 119:164 קסד  שבע ביום הללתיך--    על משפטי צדקך
Psa 119:165 קסה  שלום רב לאהבי תורתך    ואין-למו מכשול
Psa 119:166 קסו  שברתי לישועתך יהוה    ומצותיך עשיתי
Psa 119:167 קסז  שמרה נפשי עדתיך    ואהבם מאד
Psa 119:168 קסח  שמרתי פקודיך ועדתיך    כי כל-דרכי נגדך
Psa 119:169 קסט  תקרב רנתי לפניך יהוה    כדברך הבינני
Psa 119:170 קע  תבוא תחנתי לפניך    כאמרתך הצילני
Psa 119:171 קעא  תבענה שפתי תהלה    כי תלמדני חקיך
Psa 119:172 קעב  תען לשוני אמרתך    כי כל-מצותיך צדק
Psa 119:173 קעג  תהי-ידך לעזרני    כי פקודיך בחרתי
Psa 119:174 קעד  תאבתי לישועתך יהוה    ותורתך שעשעי
Psa 119:175 קעה  תחי-נפשי ותהללך    ומשפטך יעזרני
Psa 119:176 קעו  תעיתי--    כשה אבד בקש עבדך כי מצותיך    לא שכחתי