Psa 104:1 א  ברכי נפשי    את-יהוה יהוה אלהי גדלת מאד    הוד והדר לבשת
Psa 104:2 ב  עטה-אור כשלמה    נוטה שמים כיריעה
Psa 104:3 ג  המקרה במים    עליותיו השם-עבים רכובו    המהלך על-כנפי-רוח
Psa 104:4 ד  עשה מלאכיו רוחות    משרתיו אש להט
Psa 104:5 ה  יסד-ארץ על-מכוניה    בל-תמוט עולם ועד
Psa 104:6 ו  תהום כלבוש כסיתו    על-הרים יעמדו מים
Psa 104:7 ז  מן-גערתך ינוסון    מן-קול רעמך יחפזון
Psa 104:8 ח  יעלו הרים ירדו בקעות--    אל-מקום זה יסדת להם
Psa 104:9 ט  גבול-שמת בל-יעברון    בל-ישבון לכסות הארץ
Psa 104:10 י  המשלח מעינים בנחלים    בין הרים יהלכון
Psa 104:11 יא  ישקו כל-חיתו שדי    ישברו פראים צמאם
Psa 104:12 יב  עליהם עוף-השמים ישכון    מבין עפאים יתנו-קול
Psa 104:13 יג  משקה הרים מעליותיו    מפרי מעשיך תשבע הארץ
Psa 104:14 יד  מצמיח חציר לבהמה    ועשב לעבדת האדם להוציא לחם    מן-הארץ
Psa 104:15 טו  ויין ישמח לבב-אנוש--    להצהיל פנים משמן ולחם    לבב-אנוש יסעד
Psa 104:16 טז  ישבעו עצי יהוה--    ארזי לבנון אשר נטע
Psa 104:17 יז  אשר-שם צפרים יקננו    חסידה ברושים ביתה
Psa 104:18 יח  הרים הגבהים ליעלים    סלעים מחסה לשפנים
Psa 104:19 יט  עשה ירח למועדים    שמש ידע מבואו
Psa 104:20 כ  תשת-חשך ויהי לילה--    בו-תרמש כל-חיתו-יער
Psa 104:21 כא  הכפירים שאגים לטרף    ולבקש מאל אכלם
Psa 104:22 כב  תזרח השמש יאספון    ואל-מעונתם ירבצון
Psa 104:23 כג  יצא אדם לפעלו    ולעבדתו עדי-ערב
Psa 104:24 כד  מה-רבו מעשיך יהוה--    כלם בחכמה עשית מלאה הארץ    קנינך
Psa 104:25 כה  זה הים גדול--    ורחב ידים שם-רמש ואין מספר    חיות קטנות עם-גדלות
Psa 104:26 כו  שם אניות יהלכון    לויתן זה-יצרת לשחק-בו
Psa 104:27 כז  כלם אליך ישברון--    לתת אכלם בעתו
Psa 104:28 כח  תתן להם ילקטון    תפתח ידך ישבעון טוב
Psa 104:29 כט  תסתיר פניך    יבהלון תסף רוחם יגועון    ואל-עפרם ישובון
Psa 104:30 ל  תשלח רוחך יבראון    ותחדש פני אדמה
Psa 104:31 לא  יהי כבוד יהוה לעולם    ישמח יהוה במעשיו
Psa 104:32 לב  המביט לארץ ותרעד    יגע בהרים ויעשנו
Psa 104:33 לג  אשירה ליהוה בחיי    אזמרה לאלהי בעודי
Psa 104:34 לד  יערב עליו שיחי    אנכי אשמח ביהוה
Psa 104:35 לה  יתמו חטאים מן-הארץ    ורשעים עוד אינם-- ברכי נפשי    את-יהוה הללו-יה