Psa 103:1 א  לדוד  ברכי נפשי את-יהוה    וכל-קרבי את-שם קדשו
Psa 103:2 ב  ברכי נפשי את-יהוה    ואל-תשכחי כל-גמוליו
Psa 103:3 ג  הסלח לכל-עונכי    הרפא לכל-תחלואיכי
Psa 103:4 ד  הגואל משחת חייכי    המעטרכי חסד ורחמים
Psa 103:5 ה  המשביע בטוב עדיך    תתחדש כנשר נעוריכי
Psa 103:6 ו  עשה צדקות יהוה    ומשפטים לכל-עשוקים
Psa 103:7 ז  יודיע דרכיו למשה    לבני ישראל עלילותיו
Psa 103:8 ח  רחום וחנון יהוה    ארך אפים ורב-חסד
Psa 103:9 ט  לא-לנצח יריב    ולא לעולם יטור
Psa 103:10 י  לא כחטאינו עשה לנו    ולא כעונתינו גמל עלינו
Psa 103:11 יא  כי כגבה שמים על-הארץ--    גבר חסדו על-יראיו
Psa 103:12 יב  כרחק מזרח ממערב--    הרחיק ממנו את-פשעינו
Psa 103:13 יג  כרחם אב על-בנים--    רחם יהוה על-יראיו
Psa 103:14 יד  כי-הוא ידע יצרנו    זכור כי-עפר אנחנו
Psa 103:15 טו  אנוש כחציר ימיו    כציץ השדה כן יציץ
Psa 103:16 טז  כי רוח עברה-בו ואיננו    ולא-יכירנו עוד מקומו
Psa 103:17 יז  וחסד יהוה מעולם ועד-עולם--    על-יראיו וצדקתו    לבני בנים
Psa 103:18 יח  לשמרי בריתו    ולזכרי פקדיו לעשותם
Psa 103:19 יט  יהוה--בשמים הכין כסאו    ומלכותו בכל משלה
Psa 103:20 כ  ברכו יהוה    מלאכיו גברי כח עשי דברו    לשמע בקול דברו
Psa 103:21 כא  ברכו יהוה כל-צבאיו--    משרתיו עשי רצונו
Psa 103:22 כב  ברכו יהוה כל-מעשיו--    בכל-מקמות ממשלתו ברכי נפשי    את-יהוה