Psa 102:1 א  תפלה לעני כי-יעטף--    ולפני יהוה ישפך שיחו
Psa 102:2 ב  יהוה שמעה תפלתי    ושועתי אליך תבוא
Psa 102:3 ג  אל-תסתר פניך ממני--    ביום צר-לי הטה-אלי אזנך    ביום אקרא מהר ענני
Psa 102:4 ד  כי-כלו בעשן ימי    ועצמותי כמוקד נחרו
Psa 102:5 ה  הוכה-כעשב ויבש לבי    כי-שכחתי מאכל לחמי
Psa 102:6 ו  מקול אנחתי--    דבקה עצמי לבשרי
Psa 102:7 ז  דמיתי לקאת מדבר    הייתי ככוס חרבות
Psa 102:8 ח  שקדתי ואהיה--    כצפור בודד על-גג
Psa 102:9 ט  כל-היום חרפוני אויבי    מהוללי בי נשבעו
Psa 102:10 י  כי-אפר כלחם אכלתי    ושקוי בבכי מסכתי
Psa 102:11 יא  מפני-זעמך וקצפך--    כי נשאתני ותשליכני
Psa 102:12 יב  ימי כצל נטוי    ואני כעשב איבש
Psa 102:13 יג  ואתה יהוה לעולם תשב    וזכרך לדר ודר
Psa 102:14 יד  אתה תקום תרחם ציון    כי-עת לחננה כי-בא מועד
Psa 102:15 טו  כי-רצו עבדיך את-אבניה    ואת-עפרה יחננו
Psa 102:16 טז  וייראו גוים את-שם יהוה    וכל-מלכי הארץ את-כבודך
Psa 102:17 יז  כי-בנה יהוה ציון--    נראה בכבודו
Psa 102:18 יח  פנה אל-תפלת הערער    ולא-בזה את-תפלתם
Psa 102:19 יט  תכתב זאת לדור אחרון    ועם נברא יהלל-יה
Psa 102:20 כ  כי-השקיף ממרום קדשו    יהוה משמים אל-ארץ הביט
Psa 102:21 כא  לשמע אנקת אסיר    לפתח בני תמותה
Psa 102:22 כב  לספר בציון שם יהוה    ותהלתו בירושלם
Psa 102:23 כג  בהקבץ עמים יחדו    וממלכות לעבד את-יהוה
Psa 102:24 כד  ענה בדרך כחו (כחי)    קצר ימי
Psa 102:25 כה  אמר--אלי אל תעלני בחצי ימי    בדור דורים שנותיך
Psa 102:26 כו  לפנים הארץ יסדת    ומעשה ידיך שמים
Psa 102:27 כז  המה יאבדו--    ואתה תעמד וכלם כבגד יבלו    כלבוש תחליפם ויחלפו
Psa 102:28 כח  ואתה-הוא    ושנותיך לא יתמו [ (Psalms 102:29) כט  בני-עבדיך ישכונו    וזרעם לפניך יכון ]