Psa 78:1 א  משכיל לאסף האזינה עמי תורתי    הטו אזנכם לאמרי-פי
Psa 78:2 ב  אפתחה במשל פי    אביעה חידות מני-קדם
Psa 78:3 ג  אשר שמענו ונדעם    ואבותינו ספרו-לנו
Psa 78:4 ד  לא נכחד מבניהם--    לדור אחרון מספרים תהלות יהוה ועזוזו ונפלאתיו    אשר עשה
Psa 78:5 ה  ויקם עדות ביעקב    ותורה שם בישראל אשר צוה את-אבותינו--    להודיעם לבניהם
Psa 78:6 ו  למען ידעו דור אחרון--בנים יולדו    יקמו ויספרו לבניהם
Psa 78:7 ז  וישימו באלהים כסלם    ולא ישכחו מעללי-אל ומצותיו ינצרו
Psa 78:8 ח  ולא יהיו כאבותם--    דור סורר ומרה דור לא-הכין לבו    ולא-נאמנה את-אל רוחו
Psa 78:9 ט  בני-אפרים נושקי רומי-קשת    הפכו ביום קרב
Psa 78:10 י  לא שמרו ברית אלהים    ובתורתו מאנו ללכת
Psa 78:11 יא  וישכחו עלילותיו    ונפלאותיו אשר הראם
Psa 78:12 יב  נגד אבותם עשה פלא    בארץ מצרים שדה-צען
Psa 78:13 יג  בקע ים ויעבירם    ויצב-מים כמו-נד
Psa 78:14 יד  וינחם בענן יומם    וכל-הלילה באור אש
Psa 78:15 טו  יבקע צרים במדבר    וישק כתהמות רבה
Psa 78:16 טז  ויוצא נוזלים מסלע    ויורד כנהרות מים
Psa 78:17 יז  ויוסיפו עוד לחטא-לו--    למרות עליון בציה
Psa 78:18 יח  וינסו-אל בלבבם--    לשאל-אכל לנפשם
Psa 78:19 יט  וידברו באלהים    אמרו היוכל אל--לערך שלחן במדבר
Psa 78:20 כ  הן הכה-צור ויזובו מים--    ונחלים ישטפו הגם-לחם יוכל תת    אם-יכין שאר לעמו
Psa 78:21 כא  לכן שמע יהוה--    ויתעבר ואש נשקה ביעקב    וגם-אף עלה בישראל
Psa 78:22 כב  כי לא האמינו באלהים    ולא בטחו בישועתו
Psa 78:23 כג  ויצו שחקים ממעל    ודלתי שמים פתח
Psa 78:24 כד  וימטר עליהם מן לאכל    ודגן-שמים נתן למו
Psa 78:25 כה  לחם אבירים אכל איש    צידה שלח להם לשבע
Psa 78:26 כו  יסע קדים בשמים    וינהג בעזו תימן
Psa 78:27 כז  וימטר עליהם כעפר שאר    וכחול ימים עוף כנף
Psa 78:28 כח  ויפל בקרב מחנהו    סביב למשכנתיו
Psa 78:29 כט  ויאכלו וישבעו מאד    ותאותם יבא להם
Psa 78:30 ל  לא-זרו מתאותם    עוד אכלם בפיהם
Psa 78:31 לא  ואף אלהים עלה בהם    ויהרג במשמניהם ובחורי ישראל    הכריע
Psa 78:32 לב  בכל-זאת חטאו-עוד    ולא-האמינו בנפלאותיו
Psa 78:33 לג  ויכל-בהבל ימיהם    ושנותם בבהלה
Psa 78:34 לד  אם-הרגם ודרשוהו    ושבו ושחרו-אל
Psa 78:35 לה  ויזכרו כי-אלהים צורם    ואל עליון גאלם
Psa 78:36 לו  ויפתוהו בפיהם    ובלשונם יכזבו-לו
Psa 78:37 לז  ולבם לא-נכון עמו    ולא נאמנו בבריתו
Psa 78:38 לח  והוא רחום יכפר עון--    ולא-ישחית והרבה להשיב אפו    ולא-יעיר כל-חמתו
Psa 78:39 לט  ויזכר כי-בשר המה    רוח הולך ולא ישוב
Psa 78:40 מ  כמה ימרוהו במדבר    יעציבוהו בישימון
Psa 78:41 מא  וישובו וינסו אל    וקדוש ישראל התוו
Psa 78:42 מב  לא-זכרו את-ידו    יום אשר-פדם מני-צר
Psa 78:43 מג  אשר-שם במצרים אתותיו    ומופתיו בשדה-צען
Psa 78:44 מד  ויהפך לדם יאריהם    ונזליהם בל-ישתיון
Psa 78:45 מה  ישלח בהם ערב ויאכלם    וצפרדע ותשחיתם
Psa 78:46 מו  ויתן לחסיל יבולם    ויגיעם לארבה
Psa 78:47 מז  יהרג בברד גפנם    ושקמותם בחנמל
Psa 78:48 מח  ויסגר לברד בעירם    ומקניהם לרשפים
Psa 78:49 מט  ישלח-בם חרון אפו--עברה וזעם וצרה    משלחת מלאכי רעים
Psa 78:50 נ  יפלס נתיב לאפו    לא-חשך ממות נפשם וחיתם לדבר הסגיר
Psa 78:51 נא  ויך כל-בכור במצרים    ראשית אונים באהלי-חם
Psa 78:52 נב  ויסע כצאן עמו    וינהגם כעדר במדבר
Psa 78:53 נג  וינחם לבטח ולא פחדו    ואת-אויביהם כסה הים
Psa 78:54 נד  ויביאם אל-גבול קדשו    הר-זה קנתה ימינו
Psa 78:55 נה  ויגרש מפניהם גוים--    ויפילם בחבל נחלה וישכן באהליהם    שבטי ישראל
Psa 78:56 נו  וינסו וימרו את-אלהים עליון    ועדותיו לא שמרו
Psa 78:57 נז  ויסגו ויבגדו כאבותם    נהפכו כקשת רמיה
Psa 78:58 נח  ויכעיסוהו בבמותם    ובפסיליהם יקניאוהו
Psa 78:59 נט  שמע אלהים ויתעבר    וימאס מאד בישראל
Psa 78:60 ס  ויטש משכן שלו    אהל שכן באדם
Psa 78:61 סא  ויתן לשבי עזו    ותפארתו ביד-צר
Psa 78:62 סב  ויסגר לחרב עמו    ובנחלתו התעבר
Psa 78:63 סג  בחוריו אכלה-אש    ובתולתיו לא הוללו
Psa 78:64 סד  כהניו בחרב נפלו    ואלמנתיו לא תבכינה
Psa 78:65 סה  ויקץ כישן אדני    כגבור מתרונן מיין
Psa 78:66 סו  ויך-צריו אחור    חרפת עולם נתן למו
Psa 78:67 סז  וימאס באהל יוסף    ובשבט אפרים לא בחר
Psa 78:68 סח  ויבחר את-שבט יהודה    את-הר ציון אשר אהב
Psa 78:69 סט  ויבן כמו-רמים מקדשו    כארץ יסדה לעולם
Psa 78:70 ע  ויבחר בדוד עבדו    ויקחהו ממכלאת צאן
Psa 78:71 עא  מאחר עלות הביאו    לרעות ביעקב עמו ובישראל נחלתו
Psa 78:72 עב  וירעם כתם לבבו    ובתבונות כפיו ינחם