Psa 59:1 א  למנצח אל-תשחת לדוד מכתם    בשלח שאול וישמרו את-הבית    להמיתו
Psa 59:2 ב  הצילני מאיבי אלהי    ממתקוממי תשגבני
Psa 59:3 ג  הצילני מפעלי און    ומאנשי דמים הושיעני
Psa 59:4 ד  כי הנה ארבו לנפשי--    יגורו עלי עזים לא-פשעי ולא-חטאתי    יהוה
Psa 59:5 ה  בלי-עון ירצון ויכוננו    עורה לקראתי וראה
Psa 59:6 ו  ואתה יהוה-אלהים צבאות אלהי ישראל--    הקיצה לפקד כל-הגוים אל-תחן כל-בגדי און    סלה
Psa 59:7 ז  ישובו לערב יהמו ככלב    ויסובבו עיר
Psa 59:8 ח  הנה יביעון בפיהם--חרבות בשפתותיהם    כי-מי שמע
Psa 59:9 ט  ואתה יהוה תשחק-למו    תלעג לכל-גוים
Psa 59:10 י  עזו אליך אשמרה    כי-אלהים משגבי
Psa 59:11 יא  אלהי חסדו (חסדי) יקדמני    אלהים יראני בשררי
Psa 59:12 יב  אל-תהרגם פן ישכחו עמי--הניעמו בחילך והורידמו    מגננו אדני
Psa 59:13 יג  חטאת-פימו    דבר-שפתימו וילכדו בגאונם    ומאלה ומכחש יספרו
Psa 59:14 יד  כלה בחמה    כלה ואינמו וידעו--כי-אלהים משל ביעקב    לאפסי הארץ סלה
Psa 59:15 טו  וישבו לערב יהמו ככלב    ויסובבו עיר
Psa 59:16 טז  המה ינועון (יניעון) לאכל--    אם-לא ישבעו וילינו
Psa 59:17 יז  ואני אשיר עזך--    וארנן לבקר חסדך כי-היית משגב לי    ומנוס ביום צר-לי [ (Psalms 59:18) יח  עזי אליך אזמרה    כי-אלהים משגבי אלהי חסדי ]