Psa 49:1 א  למנצח לבני-קרח מזמור
Psa 49:2 ב  שמעו-זאת כל-העמים    האזינו כל-ישבי חלד
Psa 49:3 ג  גם-בני אדם גם-בני-איש--    יחד עשיר ואביון
Psa 49:4 ד  פי ידבר חכמות    והגות לבי תבונות
Psa 49:5 ה  אטה למשל אזני    אפתח בכנור חידתי
Psa 49:6 ו  למה אירא בימי רע--    עון עקבי יסובני
Psa 49:7 ז  הבטחים על-חילם    וברב עשרם יתהללו
Psa 49:8 ח  אח--לא פדה יפדה איש    לא-יתן לאלהים כפרו
Psa 49:9 ט  ויקר פדיון נפשם    וחדל לעולם
Psa 49:10 י  ויחי-עוד לנצח    לא יראה השחת
Psa 49:11 יא  כי יראה חכמים ימותו--    יחד כסיל ובער יאבדו ועזבו לאחרים    חילם
Psa 49:12 יב  קרבם בתימו לעולם--    משכנתם לדור ודר קראו בשמותם    עלי אדמות
Psa 49:13 יג  ואדם ביקר בל-ילין    נמשל כבהמות נדמו
Psa 49:14 יד  זה דרכם כסל למו    ואחריהם בפיהם ירצו סלה
Psa 49:15 טו  כצאן לשאול שתו--    מות ירעם וירדו בם ישרים לבקר--וצירם (וצורם) לבלות שאול    מזבל לו
Psa 49:16 טז  אך-אלהים--יפדה נפשי מיד-שאול    כי יקחני סלה
Psa 49:17 יז  אל-תירא כי-יעשר איש    כי-ירבה כבוד ביתו
Psa 49:18 יח  כי לא במותו יקח הכל    לא-ירד אחריו כבודו
Psa 49:19 יט  כי-נפשו בחייו יברך    ויודך כי-תיטיב לך
Psa 49:20 כ  תבוא עד-דור אבותיו    עד-נצח לא יראו-אור [ (Psalms 49:21) כא  אדם ביקר ולא יבין    נמשל כבהמות נדמו ]