Psa 39:1 א  למנצח לידיתון (לידותון)    מזמור לדוד
Psa 39:2 ב  אמרתי--    אשמרה דרכי מחטוא בלשוני אשמרה לפי מחסום--    בעד רשע לנגדי
Psa 39:3 ג  נאלמתי דומיה החשיתי מטוב    וכאבי נעכר
Psa 39:4 ד  חם-לבי בקרבי--בהגיגי תבער-אש    דברתי בלשוני
Psa 39:5 ה  הודיעני יהוה קצי--ומדת ימי מה-היא    אדעה מה-חדל אני
Psa 39:6 ו  הנה טפחות נתתה ימי--    וחלדי כאין נגדך אך כל-הבל כל-אדם    נצב סלה
Psa 39:7 ז  אך-בצלם יתהלך-איש--    אך-הבל יהמיון יצבר    ולא-ידע מי-אספם
Psa 39:8 ח  ועתה מה-קויתי אדני--    תוחלתי לך היא
Psa 39:9 ט  מכל-פשעי הצילני    חרפת נבל אל-תשימני
Psa 39:10 י  נאלמתי לא אפתח-פי    כי אתה עשית
Psa 39:11 יא  הסר מעלי נגעך    מתגרת ידך אני כליתי
Psa 39:12 יב  בתוכחות על-עון יסרת איש--    ותמס כעש חמודו אך הבל כל-אדם    סלה
Psa 39:13 יג  שמעה תפלתי יהוה    ושועתי האזינה-- אל-דמעתי    אל-תחרש כי גר אנכי עמך    תושב ככל-אבותי [ (Psalms 39:14) יד  השע ממני ואבליגה--    בטרם אלך ואינני ]