Ezr 8:1 א ואלה ראשי אבתיהם והתיחשם  העלים עמי במלכות ארתחשסתא המלך--מבבל  {ס}
Ezr 8:2 ב מבני פינחס גרשם  {ס}  מבני איתמר דניאל  {ס}  מבני דויד חטוש  {ס}
Ezr 8:3 ג מבני שכניה  {ס}  מבני פרעש זכריה ועמו התיחש לזכרים מאה וחמשים  {ס}
Ezr 8:4 ד מבני פחת מואב אליהועיני בן זרחיה ועמו מאתים הזכרים  {ס}
Ezr 8:5 ה מבני שכניה בן יחזיאל ועמו שלש מאות הזכרים  {ס}
Ezr 8:6 ו ומבני עדין עבד בן יונתן ועמו חמשים הזכרים  {ס}
Ezr 8:7 ז ומבני עילם ישעיה בן עתליה ועמו שבעים הזכרים  {ס}
Ezr 8:8 ח ומבני שפטיה זבדיה בן מיכאל ועמו שמנים הזכרים  {ס}
Ezr 8:9 ט מבני יואב עבדיה בן יחיאל ועמו מאתים ושמנה עשר הזכרים  {ס}
Ezr 8:10 י ומבני שלומית בן יוספיה ועמו מאה וששים הזכרים  {ס}
Ezr 8:11 יא ומבני בבי זכריה בן בבי ועמו עשרים ושמנה הזכרים  {ס}
Ezr 8:12 יב ומבני עזגד יוחנן בן הקטן ועמו מאה ועשרה הזכרים  {ס}
Ezr 8:13 יג ומבני אדניקם אחרנים--ואלה שמותם אליפלט יעיאל ושמעיה ועמהם ששים הזכרים  {ס}
Ezr 8:14 יד ומבני בגוי עותי וזבוד (וזכור) ועמו שבעים הזכרים  {פ}
Ezr 8:15 טו ואקבצם אל הנהר הבא אל אהוא ונחנה שם ימים שלשה ואבינה בעם ובכהנים ומבני לוי לא מצאתי שם
Ezr 8:16 טז ואשלחה לאליעזר לאריאל לשמעיה ולאלנתן וליריב ולאלנתן ולנתן ולזכריה ולמשלם--ראשים וליויריב ולאלנתן מבינים
Ezr 8:17 יז ואוצאה (ואצוה) אותם על אדו הראש בכספיא המקום ואשימה בפיהם דברים לדבר אל אדו אחיו הנתונים (הנתינים) בכספיא המקום--להביא לנו משרתים לבית אלהינו
Ezr 8:18 יח ויביאו לנו כיד אלהינו הטובה עלינו איש שכל--מבני מחלי בן לוי בן ישראל ושרביה ובניו ואחיו שמנה עשר
Ezr 8:19 יט ואת חשביה--ואתו ישעיה מבני מררי  אחיו ובניהם עשרים  {ס}
Ezr 8:20 כ ומן הנתינים שנתן דויד והשרים לעבדת הלוים--נתינים מאתים ועשרים  כלם נקבו בשמות
Ezr 8:21 כא ואקרא שם צום על הנהר אהוא להתענות לפני אלהינו--לבקש ממנו דרך ישרה לנו ולטפנו ולכל רכושנו
Ezr 8:22 כב כי בשתי לשאול מן המלך חיל ופרשים--לעזרנו מאויב בדרך  כי אמרנו למלך לאמר יד אלהינו על כל מבקשיו לטובה ועזו ואפו על כל עזביו
Ezr 8:23 כג ונצומה ונבקשה מאלהינו על זאת ויעתר לנו
Ezr 8:24 כד ואבדילה משרי הכהנים שנים עשר--לשרביה חשביה ועמהם מאחיהם עשרה
Ezr 8:25 כה ואשקולה (ואשקלה) להם את הכסף ואת הזהב ואת הכלים--תרומת בית אלהינו ההרימו המלך ויעציו ושריו וכל ישראל הנמצאים
Ezr 8:26 כו ואשקלה על ידם כסף ככרים שש מאות וחמשים וכלי כסף מאה לככרים זהב מאה ככר
Ezr 8:27 כז וכפרי זהב עשרים לאדרכנים אלף וכלי נחשת מצהב טובה שנים--חמודת כזהב
Ezr 8:28 כח ואמרה אלהם אתם קדש ליהוה והכלים קדש והכסף והזהב נדבה ליהוה אלהי אבתיכם
Ezr 8:29 כט שקדו ושמרו עד תשקלו לפני שרי הכהנים והלוים ושרי האבות לישראל--בירושלם  הלשכות בית יהוה
Ezr 8:30 ל וקבלו הכהנים והלוים משקל הכסף והזהב והכלים--להביא לירושלם לבית אלהינו  {פ}
Ezr 8:31 לא ונסעה מנהר אהוא בשנים עשר לחדש הראשון--ללכת ירושלם ויד אלהינו היתה עלינו ויצילנו מכף אויב ואורב על הדרך
Ezr 8:32 לב ונבוא ירושלם ונשב שם ימים שלשה
Ezr 8:33 לג וביום הרביעי נשקל הכסף והזהב והכלים בבית אלהינו על יד מרמות בן אוריה הכהן ועמו אלעזר בן פינחס ועמהם יוזבד בן ישוע ונועדיה בן בנוי--הלוים
Ezr 8:34 לד במספר במשקל לכל ויכתב כל המשקל בעת ההיא  {פ}
Ezr 8:35 לה הבאים מהשבי בני הגולה הקריבו עלות לאלהי ישראל פרים שנים עשר על כל ישראל אילים תשעים וששה כבשים שבעים ושבעה צפירי חטאת שנים עשר  הכל עולה ליהוה  {פ}
Ezr 8:36 לו ויתנו את דתי המלך לאחשדרפני המלך ופחוות עבר הנהר ונשאו את העם ואת בית האלהים  {ס}