Deut 28:1 א והיה אם שמוע תשמע בקול יהוה אלהיך לשמר לעשות את כל מצותיו אשר אנכי מצוך היום--ונתנך יהוה אלהיך עליון על כל גויי הארץ
Deut 28:2 ב ובאו עליך כל הברכות האלה והשיגך  כי תשמע בקול יהוה אלהיך
Deut 28:3 ג ברוך אתה בעיר וברוך אתה בשדה
Deut 28:4 ד ברוך פרי בטנך ופרי אדמתך ופרי בהמתך--שגר אלפיך ועשתרות צאנך
Deut 28:5 ה ברוך טנאך ומשארתך
Deut 28:6 ו ברוך אתה בבאך וברוך אתה בצאתך
Deut 28:7 ז יתן יהוה את איביך הקמים עליך נגפים לפניך  בדרך אחד יצאו אליך ובשבעה דרכים ינוסו לפניך
Deut 28:8 ח יצו יהוה אתך את הברכה באסמיך ובכל משלח ידך וברכך--בארץ אשר יהוה אלהיך נתן לך
Deut 28:9 ט יקימך יהוה לו לעם קדוש כאשר נשבע לך  כי תשמר את מצות יהוה אלהיך והלכת בדרכיו
Deut 28:10 י וראו כל עמי הארץ כי שם יהוה נקרא עליך ויראו ממך
Deut 28:11 יא והותרך יהוה לטובה בפרי בטנך ובפרי בהמתך ובפרי אדמתך--על האדמה אשר נשבע יהוה לאבתיך לתת לך
Deut 28:12 יב יפתח יהוה לך את אוצרו הטוב את השמים לתת מטר ארצך בעתו ולברך את כל מעשה ידך והלוית גוים רבים ואתה לא תלוה
Deut 28:13 יג ונתנך יהוה לראש ולא לזנב והיית רק למעלה ולא תהיה למטה  כי תשמע אל מצות יהוה אלהיך אשר אנכי מצוך היום--לשמר ולעשות
Deut 28:14 יד ולא תסור מכל הדברים אשר אנכי מצוה אתכם היום--ימין ושמאול  ללכת אחרי אלהים אחרים--לעבדם  {פ}
Deut 28:15 טו והיה אם לא תשמע בקול יהוה אלהיך לשמר לעשות את כל מצותיו וחקתיו אשר אנכי מצוך היום--ובאו עליך כל הקללות האלה והשיגוך
Deut 28:16 טז ארור אתה בעיר וארור אתה בשדה
Deut 28:17 יז ארור טנאך ומשארתך
Deut 28:18 יח ארור פרי בטנך ופרי אדמתך--שגר אלפיך ועשתרת צאנך
Deut 28:19 יט ארור אתה בבאך וארור אתה בצאתך
Deut 28:20 כ ישלח יהוה בך את המארה את המהומה ואת המגערת בכל משלח ידך אשר תעשה--עד השמדך ועד אבדך מהר מפני רע מעלליך אשר עזבתני
Deut 28:21 כא ידבק יהוה בך את הדבר--עד כלתו אתך מעל האדמה אשר אתה בא שמה לרשתה
Deut 28:22 כב יככה יהוה בשחפת ובקדחת ובדלקת ובחרחר ובחרב ובשדפון ובירקון ורדפוך עד אבדך
Deut 28:23 כג והיו שמיך אשר על ראשך נחשת והארץ אשר תחתיך ברזל
Deut 28:24 כד יתן יהוה את מטר ארצך אבק ועפר  מן השמים ירד עליך עד השמדך
Deut 28:25 כה יתנך יהוה נגף לפני איביך--בדרך אחד תצא אליו ובשבעה דרכים תנוס לפניו והיית לזעוה לכל ממלכות הארץ
Deut 28:26 כו והיתה נבלתך למאכל לכל עוף השמים ולבהמת הארץ ואין מחריד
Deut 28:27 כז יככה יהוה בשחין מצרים ובעפלים (ובטחרים) ובגרב ובחרס--אשר לא תוכל להרפא
Deut 28:28 כח יככה יהוה בשגעון ובעורון ובתמהון לבב
Deut 28:29 כט והיית ממשש בצהרים כאשר ימשש העור באפלה ולא תצליח את דרכיך והיית אך עשוק וגזול כל הימים--ואין מושיע
Deut 28:30 ל אשה תארש ואיש אחר ישגלנה (ישכבנה)--בית תבנה ולא תשב בו כרם תטע ולא תחללנו
Deut 28:31 לא שורך טבוח לעיניך ולא תאכל ממנו--חמרך גזול מלפניך ולא ישוב לך צאנך נתנות לאיביך ואין לך מושיע
Deut 28:32 לב בניך ובנתיך נתנים לעם אחר ועיניך ראות וכלות אליהם כל היום ואין לאל ידך
Deut 28:33 לג פרי אדמתך וכל יגיעך יאכל עם אשר לא ידעת והיית רק עשוק ורצוץ--כל הימים
Deut 28:34 לד והיית משגע ממראה עיניך אשר תראה
Deut 28:35 לה יככה יהוה בשחין רע על הברכים ועל השקים אשר לא תוכל להרפא--מכף רגלך ועד קדקדך
Deut 28:36 לו יולך יהוה אתך ואת מלכך אשר תקים עליך אל גוי אשר לא ידעת אתה ואבתיך ועבדת שם אלהים אחרים עץ ואבן
Deut 28:37 לז והיית לשמה למשל ולשנינה--בכל העמים אשר ינהגך יהוה שמה
Deut 28:38 לח זרע רב תוציא השדה ומעט תאסף כי יחסלנו הארבה
Deut 28:39 לט כרמים תטע ועבדת ויין לא תשתה ולא תאגר כי תאכלנו התלעת
Deut 28:40 מ זיתים יהיו לך בכל גבולך ושמן לא תסוך כי ישל זיתך
Deut 28:41 מא בנים ובנות תוליד ולא יהיו לך כי ילכו בשבי
Deut 28:42 מב כל עצך ופרי אדמתך יירש הצלצל
Deut 28:43 מג הגר אשר בקרבך יעלה עליך מעלה מעלה ואתה תרד מטה מטה
Deut 28:44 מד הוא ילוך ואתה לא תלונו הוא יהיה לראש ואתה תהיה לזנב
Deut 28:45 מה ובאו עליך כל הקללות האלה ורדפוך והשיגוך עד השמדך  כי לא שמעת בקול יהוה אלהיך--לשמר מצותיו וחקתיו אשר צוך
Deut 28:46 מו והיו בך לאות ולמופת ובזרעך עד עולם
Deut 28:47 מז תחת אשר לא עבדת את יהוה אלהיך בשמחה ובטוב לבב--מרב כל
Deut 28:48 מח ועבדת את איביך אשר ישלחנו יהוה בך ברעב ובצמא ובעירם ובחסר כל ונתן על ברזל על צוארך עד השמידו אתך
Deut 28:49 מט ישא יהוה עליך גוי מרחק מקצה הארץ כאשר ידאה הנשר  גוי אשר לא תשמע לשנו
Deut 28:50 נ גוי עז פנים אשר לא ישא פנים לזקן ונער לא יחן
Deut 28:51 נא ואכל פרי בהמתך ופרי אדמתך עד השמדך אשר לא ישאיר לך דגן תירוש ויצהר שגר אלפיך ועשתרת צאנך--עד האבידו אתך
Deut 28:52 נב והצר לך בכל שעריך עד רדת חמתיך הגבהת והבצרות אשר אתה בטח בהן בכל ארצך והצר לך בכל שעריך בכל ארצך אשר נתן יהוה אלהיך לך
Deut 28:53 נג ואכלת פרי בטנך בשר בניך ובנתיך אשר נתן לך יהוה אלהיך--במצור ובמצוק אשר יציק לך איבך
Deut 28:54 נד האיש הרך בך והענג מאד--תרע עינו באחיו ובאשת חיקו וביתר בניו אשר יותיר
Deut 28:55 נה מתת לאחד מהם מבשר בניו אשר יאכל מבלי השאיר לו כל--במצור ובמצוק אשר יציק לך איבך בכל שעריך
Deut 28:56 נו הרכה בך והענגה אשר לא נסתה כף רגלה הצג על הארץ מהתענג ומרך--תרע עינה באיש חיקה ובבנה ובבתה
Deut 28:57 נז ובשליתה היוצת מבין רגליה ובבניה אשר תלד כי תאכלם בחסר כל בסתר--במצור ובמצוק אשר יציק לך איבך בשעריך
Deut 28:58 נח אם לא תשמר לעשות את כל דברי התורה הזאת הכתבים בספר הזה  ליראה את השם הנכבד והנורא הזה--את יהוה אלהיך
Deut 28:59 נט והפלא יהוה את מכתך ואת מכות זרעך  מכות גדלת ונאמנות וחלים רעים ונאמנים
Deut 28:60 ס והשיב בך את כל מדוה מצרים אשר יגרת מפניהם ודבקו בך
Deut 28:61 סא גם כל חלי וכל מכה אשר לא כתוב בספר התורה הזאת--יעלם יהוה עליך עד השמדך
Deut 28:62 סב ונשארתם במתי מעט תחת אשר הייתם ככוכבי השמים לרב  כי לא שמעת בקול יהוה אלהיך
Deut 28:63 סג והיה כאשר שש יהוה עליכם להיטיב אתכם ולהרבות אתכם--כן ישיש יהוה עליכם להאביד אתכם ולהשמיד אתכם ונסחתם מעל האדמה אשר אתה בא שמה לרשתה
Deut 28:64 סד והפיצך יהוה בכל העמים מקצה הארץ ועד קצה הארץ ועבדת שם אלהים אחרים אשר לא ידעת אתה ואבתיך--עץ ואבן
Deut 28:65 סה ובגוים ההם לא תרגיע ולא יהיה מנוח לכף רגלך ונתן יהוה לך שם לב רגז וכליון עינים ודאבון נפש
Deut 28:66 סו והיו חייך תלאים לך מנגד ופחדת לילה ויומם ולא תאמין בחייך
Deut 28:67 סז בבקר תאמר מי יתן ערב ובערב תאמר מי יתן בקר--מפחד לבבך אשר תפחד וממראה עיניך אשר תראה
Deut 28:68 סח והשיבך יהוה מצרים באניות בדרך אשר אמרתי לך לא תסיף עוד לראתה והתמכרתם שם לאיביך לעבדים ולשפחות ואין קנה  {ס} [ (Deuteronomy 28:69) סט אלה דברי הברית אשר צוה יהוה את משה לכרת את בני ישראל--בארץ מואב  מלבד הברית אשר כרת אתם בחרב  {פ} ]