Deut 1:1 א אלה הדברים אשר דבר משה אל כל ישראל בעבר הירדן  במדבר בערבה מול סוף בין פארן ובין תפל ולבן וחצרת--ודי זהב
Deut 1:2 ב אחד עשר יום מחרב דרך הר שעיר עד קדש ברנע
Deut 1:3 ג ויהי בארבעים שנה בעשתי עשר חדש באחד לחדש דבר משה אל בני ישראל ככל אשר צוה יהוה אתו אלהם
Deut 1:4 ד אחרי הכתו את סיחן מלך האמרי אשר יושב בחשבון--ואת עוג מלך הבשן אשר יושב בעשתרת באדרעי
Deut 1:5 ה בעבר הירדן בארץ מואב הואיל משה באר את התורה הזאת לאמר
Deut 1:6 ו יהוה אלהינו דבר אלינו בחרב לאמר  רב לכם שבת בהר הזה
Deut 1:7 ז פנו וסעו לכם ובאו הר האמרי ואל כל שכניו בערבה בהר ובשפלה ובנגב ובחוף הים--ארץ הכנעני והלבנון עד הנהר הגדל נהר פרת
Deut 1:8 ח ראה נתתי לפניכם את הארץ באו ורשו את הארץ אשר נשבע יהוה לאבתיכם לאברהם ליצחק וליעקב לתת להם ולזרעם אחריהם
Deut 1:9 ט ואמר אלכם בעת ההוא לאמר  לא אוכל לבדי שאת אתכם
Deut 1:10 י יהוה אלהיכם הרבה אתכם והנכם היום ככוכבי השמים לרב
Deut 1:11 יא יהוה אלהי אבותכם יסף עליכם ככם--אלף פעמים ויברך אתכם כאשר דבר לכם
Deut 1:12 יב איכה אשא לבדי טרחכם ומשאכם וריבכם
Deut 1:13 יג הבו לכם אנשים חכמים ונבנים וידעים--לשבטיכם ואשימם בראשיכם
Deut 1:14 יד ותענו אתי ותאמרו טוב הדבר אשר דברת לעשות
Deut 1:15 טו ואקח את ראשי שבטיכם אנשים חכמים וידעים ואתן אותם ראשים עליכם  שרי אלפים ושרי מאות ושרי חמשים ושרי עשרת ושטרים לשבטיכם
Deut 1:16 טז ואצוה את שפטיכם בעת ההוא לאמר  שמע בין אחיכם ושפטתם צדק בין איש ובין אחיו ובין גרו
Deut 1:17 יז לא תכירו פנים במשפט כקטן כגדל תשמעון--לא תגורו מפני איש כי המשפט לאלהים הוא והדבר אשר יקשה מכם תקרבון אלי ושמעתיו
Deut 1:18 יח ואצוה אתכם בעת ההוא את כל הדברים אשר תעשון
Deut 1:19 יט ונסע מחרב ונלך את כל המדבר הגדול והנורא ההוא אשר ראיתם דרך הר האמרי כאשר צוה יהוה אלהינו אתנו ונבא עד קדש ברנע
Deut 1:20 כ ואמר אלכם  באתם עד הר האמרי אשר יהוה אלהינו נתן לנו
Deut 1:21 כא ראה נתן יהוה אלהיך לפניך--את הארץ  עלה רש כאשר דבר יהוה אלהי אבתיך לך--אל תירא ואל תחת
Deut 1:22 כב ותקרבון אלי כלכם ותאמרו נשלחה אנשים לפנינו ויחפרו לנו את הארץ וישבו אתנו דבר--את הדרך אשר נעלה בה ואת הערים אשר נבא אליהן
Deut 1:23 כג וייטב בעיני הדבר ואקח מכם שנים עשר אנשים איש אחד לשבט
Deut 1:24 כד ויפנו ויעלו ההרה ויבאו עד נחל אשכל וירגלו אתה
Deut 1:25 כה ויקחו בידם מפרי הארץ ויורדו אלינו וישבו אתנו דבר ויאמרו טובה הארץ אשר יהוה אלהינו נתן לנו
Deut 1:26 כו ולא אביתם לעלת ותמרו את פי יהוה אלהיכם
Deut 1:27 כז ותרגנו באהליכם ותאמרו בשנאת יהוה אתנו הוציאנו מארץ מצרים--לתת אתנו ביד האמרי להשמידנו
Deut 1:28 כח אנה אנחנו עלים אחינו המסו את לבבנו לאמר עם גדול ורם ממנו ערים גדלת ובצורת בשמים וגם בני ענקים ראינו שם
Deut 1:29 כט ואמר אלכם  לא תערצון ולא תיראון מהם
Deut 1:30 ל יהוה אלהיכם ההלך לפניכם הוא ילחם לכם  ככל אשר עשה אתכם במצרים--לעיניכם
Deut 1:31 לא ובמדבר אשר ראית אשר נשאך יהוה אלהיך כאשר ישא איש את בנו--בכל הדרך אשר הלכתם עד באכם עד המקום הזה
Deut 1:32 לב ובדבר הזה--אינכם מאמינם ביהוה אלהיכם
Deut 1:33 לג ההלך לפניכם בדרך לתור לכם מקום--לחנתכם  באש לילה לראתכם בדרך אשר תלכו בה ובענן יומם
Deut 1:34 לד וישמע יהוה את קול דבריכם ויקצף וישבע לאמר
Deut 1:35 לה אם יראה איש באנשים האלה הדור הרע הזה--את הארץ הטובה אשר נשבעתי לתת לאבתיכם
Deut 1:36 לו זולתי כלב בן יפנה הוא יראנה ולו אתן את הארץ אשר דרך בה ולבניו--יען אשר מלא אחרי יהוה
Deut 1:37 לז גם בי התאנף יהוה בגללכם לאמר  גם אתה לא תבא שם
Deut 1:38 לח יהושע בן נון העמד לפניך הוא יבא שמה אתו חזק כי הוא ינחלנה את ישראל
Deut 1:39 לט וטפכם אשר אמרתם לבז יהיה ובניכם אשר לא ידעו היום טוב ורע--המה יבאו שמה ולהם אתננה והם יירשוה
Deut 1:40 מ ואתם פנו לכם וסעו המדברה דרך ים סוף
Deut 1:41 מא ותענו ותאמרו אלי חטאנו ליהוה--אנחנו נעלה ונלחמנו ככל אשר צונו יהוה אלהינו ותחגרו איש את כלי מלחמתו ותהינו לעלת ההרה
Deut 1:42 מב ויאמר יהוה אלי אמר להם לא תעלו ולא תלחמו--כי אינני בקרבכם ולא תנגפו לפני איביכם
Deut 1:43 מג ואדבר אליכם ולא שמעתם ותמרו את פי יהוה ותזדו ותעלו ההרה
Deut 1:44 מד ויצא האמרי הישב בהר ההוא לקראתכם וירדפו אתכם כאשר תעשינה הדברים ויכתו אתכם בשעיר עד חרמה
Deut 1:45 מה ותשבו ותבכו לפני יהוה ולא שמע יהוה בקלכם ולא האזין אליכם
Deut 1:46 מו ותשבו בקדש ימים רבים כימים אשר ישבתם