Deut 23:1 א לא יקח איש את אשת אביו ולא יגלה כנף אביו  {ס}
Deut 23:2 ב לא יבא פצוע דכא וכרות שפכה בקהל יהוה  {ס}
Deut 23:3 ג לא יבא ממזר בקהל יהוה  גם דור עשירי לא יבא לו בקהל יהוה  {ס}
Deut 23:4 ד לא יבא עמוני ומואבי בקהל יהוה  גם דור עשירי לא יבא להם בקהל יהוה עד עולם
Deut 23:5 ה על דבר אשר לא קדמו אתכם בלחם ובמים בדרך בצאתכם ממצרים ואשר שכר עליך את בלעם בן בעור מפתור ארם נהרים--לקללך
Deut 23:6 ו ולא אבה יהוה אלהיך לשמע אל בלעם ויהפך יהוה אלהיך לך את הקללה לברכה  כי אהבך יהוה אלהיך
Deut 23:7 ז לא תדרש שלמם וטבתם כל ימיך לעולם  {ס}
Deut 23:8 ח לא תתעב אדמי כי אחיך הוא לא תתעב מצרי כי גר היית בארצו
Deut 23:9 ט בנים אשר יולדו להם דור שלישי--יבא להם בקהל יהוה  {ס}
Deut 23:10 י כי תצא מחנה על איביך  ונשמרת--מכל דבר רע
Deut 23:11 יא כי יהיה בך איש אשר לא יהיה טהור מקרה לילה--ויצא אל מחוץ למחנה לא יבא אל תוך המחנה
Deut 23:12 יב והיה לפנות ערב ירחץ במים וכבא השמש יבא אל תוך המחנה
Deut 23:13 יג ויד תהיה לך מחוץ למחנה ויצאת שמה חוץ
Deut 23:14 יד ויתד תהיה לך על אזנך והיה בשבתך חוץ וחפרתה בה ושבת וכסית את צאתך
Deut 23:15 טו כי יהוה אלהיך מתהלך בקרב מחנך להצילך ולתת איביך לפניך והיה מחניך קדוש  ולא יראה בך ערות דבר ושב מאחריך  {ס}
Deut 23:16 טז לא תסגיר עבד אל אדניו אשר ינצל אליך מעם אדניו
Deut 23:17 יז עמך ישב בקרבך במקום אשר יבחר באחד שעריך--בטוב לו לא תוננו  {ס}
Deut 23:18 יח לא תהיה קדשה מבנות ישראל ולא יהיה קדש מבני ישראל
Deut 23:19 יט לא תביא אתנן זונה ומחיר כלב בית יהוה אלהיך--לכל נדר  כי תועבת יהוה אלהיך גם שניהם  {ס}
Deut 23:20 כ לא תשיך לאחיך נשך כסף נשך אכל  נשך כל דבר אשר ישך
Deut 23:21 כא לנכרי תשיך ולאחיך לא תשיך--למען יברכך יהוה אלהיך בכל משלח ידך על הארץ אשר אתה בא שמה לרשתה  {ס}
Deut 23:22 כב כי תדר נדר ליהוה אלהיך לא תאחר לשלמו  כי דרש ידרשנו יהוה אלהיך מעמך והיה בך חטא
Deut 23:23 כג וכי תחדל לנדר--לא יהיה בך חטא
Deut 23:24 כד מוצא שפתיך תשמר ועשית  כאשר נדרת ליהוה אלהיך נדבה אשר דברת בפיך  {ס}
Deut 23:25 כה כי תבא בכרם רעך ואכלת ענבים כנפשך שבעך ואל כליך לא תתן  {ס} [ (Deuteronomy 23:26) כו כי תבא בקמת רעך וקטפת מלילת בידך וחרמש לא תניף על קמת רעך  {ס} ]