Deut 24:1 א כי יקח איש אשה ובעלה והיה אם לא תמצא חן בעיניו כי מצא בה ערות דבר--וכתב לה ספר כריתת ונתן בידה ושלחה מביתו
Deut 24:2 ב ויצאה מביתו והלכה והיתה לאיש אחר
Deut 24:3 ג ושנאה האיש האחרון וכתב לה ספר כריתת ונתן בידה ושלחה מביתו או כי ימות האיש האחרון אשר לקחה לו לאשה
Deut 24:4 ד לא יוכל בעלה הראשון אשר שלחה לשוב לקחתה להיות לו לאשה אחרי אשר הטמאה--כי תועבה הוא לפני יהוה ולא תחטיא את הארץ אשר יהוה אלהיך נתן לך נחלה  {ס}
Deut 24:5 ה כי יקח איש אשה חדשה--לא יצא בצבא ולא יעבר עליו לכל דבר  נקי יהיה לביתו שנה אחת ושמח את אשתו אשר לקח
Deut 24:6 ו לא יחבל רחים ורכב  כי נפש הוא חבל  {ס}
Deut 24:7 ז כי ימצא איש גנב נפש מאחיו מבני ישראל והתעמר בו ומכרו--ומת הגנב ההוא ובערת הרע מקרבך  {ס}
Deut 24:8 ח השמר בנגע הצרעת לשמר מאד ולעשות  ככל אשר יורו אתכם הכהנים הלוים כאשר צויתם--תשמרו לעשות
Deut 24:9 ט זכור את אשר עשה יהוה אלהיך למרים בדרך בצאתכם ממצרים  {ס}
Deut 24:10 י כי תשה ברעך משאת מאומה--לא תבא אל ביתו לעבט עבטו
Deut 24:11 יא בחוץ תעמד והאיש אשר אתה נשה בו יוציא אליך את העבוט החוצה
Deut 24:12 יב ואם איש עני הוא--לא תשכב בעבטו
Deut 24:13 יג השב תשיב לו את העבוט כבוא השמש ושכב בשלמתו וברכך ולך תהיה צדקה לפני יהוה אלהיך  {ס}
Deut 24:14 יד לא תעשק שכיר עני ואביון מאחיך או מגרך אשר בארצך בשעריך
Deut 24:15 טו ביומו תתן שכרו ולא תבוא עליו השמש כי עני הוא ואליו הוא נשא את נפשו ולא יקרא עליך אל יהוה והיה בך חטא  {ס}
Deut 24:16 טז לא יומתו אבות על בנים ובנים לא יומתו על אבות  איש בחטאו יומתו  {ס}
Deut 24:17 יז לא תטה משפט גר יתום ולא תחבל בגד אלמנה
Deut 24:18 יח וזכרת כי עבד היית במצרים ויפדך יהוה אלהיך משם על כן אנכי מצוך לעשות את הדבר הזה  {ס}
Deut 24:19 יט כי תקצר קצירך בשדך ושכחת עמר בשדה לא תשוב לקחתו--לגר ליתום ולאלמנה יהיה  למען יברכך יהוה אלהיך בכל מעשה ידיך  {ס}
Deut 24:20 כ כי תחבט זיתך לא תפאר אחריך  לגר ליתום ולאלמנה יהיה
Deut 24:21 כא כי תבצר כרמך לא תעולל אחריך  לגר ליתום ולאלמנה יהיה
Deut 24:22 כב וזכרת כי עבד היית בארץ מצרים על כן אנכי מצוך לעשות את הדבר הזה  {ס}