Lev 24:1 א וידבר יהוה אל משה לאמר
Lev 24:2 ב צו את בני ישראל ויקחו אליך שמן זית זך כתית--למאור  להעלת נר תמיד
Lev 24:3 ג מחוץ לפרכת העדת באהל מועד יערך אתו אהרן מערב עד בקר לפני יהוה--תמיד  חקת עולם לדרתיכם
Lev 24:4 ד על המנרה הטהרה יערך את הנרות לפני יהוה תמיד  {פ}
Lev 24:5 ה ולקחת סלת--ואפית אתה שתים עשרה חלות שני עשרנים יהיה החלה האחת
Lev 24:6 ו ושמת אותם שתים מערכות שש המערכת על השלחן הטהר לפני יהוה
Lev 24:7 ז ונתת על המערכת לבנה זכה והיתה ללחם לאזכרה אשה ליהוה
Lev 24:8 ח ביום השבת ביום השבת יערכנו לפני יהוה--תמיד  מאת בני ישראל ברית עולם
Lev 24:9 ט והיתה לאהרן ולבניו ואכלהו במקום קדש  כי קדש קדשים הוא לו מאשי יהוה--חק עולם  {ס}
Lev 24:10 י ויצא בן אשה ישראלית והוא בן איש מצרי בתוך בני ישראל וינצו במחנה בן הישראלית ואיש הישראלי
Lev 24:11 יא ויקב בן האשה הישראלית את השם ויקלל ויביאו אתו אל משה ושם אמו שלמית בת דברי למטה דן
Lev 24:12 יב ויניחהו במשמר לפרש להם על פי יהוה  {פ}
Lev 24:13 יג וידבר יהוה אל משה לאמר
Lev 24:14 יד הוצא את המקלל אל מחוץ למחנה וסמכו כל השמעים את ידיהם על ראשו ורגמו אתו כל העדה
Lev 24:15 טו ואל בני ישראל תדבר לאמר  איש איש כי יקלל אלהיו ונשא חטאו
Lev 24:16 טז ונקב שם יהוה מות יומת רגום ירגמו בו כל העדה  כגר כאזרח--בנקבו שם יומת
Lev 24:17 יז ואיש כי יכה כל נפש אדם--מות יומת
Lev 24:18 יח ומכה נפש בהמה ישלמנה--נפש תחת נפש
Lev 24:19 יט ואיש כי יתן מום בעמיתו--כאשר עשה כן יעשה לו
Lev 24:20 כ שבר תחת שבר עין תחת עין שן תחת שן--כאשר יתן מום באדם כן ינתן בו
Lev 24:21 כא ומכה בהמה ישלמנה ומכה אדם יומת
Lev 24:22 כב משפט אחד יהיה לכם כגר כאזרח יהיה  כי אני יהוה אלהיכם
Lev 24:23 כג וידבר משה אל בני ישראל ויוציאו את המקלל אל מחוץ למחנה וירגמו אתו אבן ובני ישראל עשו כאשר צוה יהוה את משה  {פ}