Exo 39:1 א ומן התכלת והארגמן ותולעת השני עשו בגדי שרד לשרת בקדש ויעשו את בגדי הקדש אשר לאהרן כאשר צוה יהוה את משה  {פ}
Exo 39:2 ב ויעש את האפד  זהב תכלת וארגמן ותולעת שני--ושש משזר
Exo 39:3 ג וירקעו את פחי הזהב וקצץ פתילם לעשות בתוך התכלת ובתוך הארגמן ובתוך תולעת השני ובתוך השש--מעשה חשב
Exo 39:4 ד כתפת עשו לו חברת--על שני קצוותו (קצותיו) חבר
Exo 39:5 ה וחשב אפדתו אשר עליו ממנו הוא כמעשהו זהב תכלת וארגמן ותולעת שני ושש משזר--כאשר צוה יהוה את משה  {ס}
Exo 39:6 ו ויעשו את אבני השהם מסבת משבצת זהב מפתחת פתוחי חותם על שמות בני ישראל
Exo 39:7 ז וישם אתם על כתפת האפד--אבני זכרון לבני ישראל  כאשר צוה יהוה את משה  {פ}
Exo 39:8 ח ויעש את החשן מעשה חשב כמעשה אפד  זהב תכלת וארגמן ותולעת שני--ושש משזר
Exo 39:9 ט רבוע היה כפול עשו את החשן--זרת ארכו וזרת רחבו כפול
Exo 39:10 י וימלאו בו--ארבעה טורי אבן  טור אדם פטדה וברקת--הטור האחד
Exo 39:11 יא והטור השני--נפך ספיר ויהלם
Exo 39:12 יב והטור השלישי--לשם שבו ואחלמה
Exo 39:13 יג והטור הרביעי--תרשיש שהם וישפה  מוסבת משבצת זהב במלאתם
Exo 39:14 יד והאבנים על שמת בני ישראל הנה שתים עשרה--על שמתם  פתוחי חתם איש על שמו לשנים עשר שבט
Exo 39:15 טו ויעשו על החשן שרשרת גבלת מעשה עבת זהב טהור
Exo 39:16 טז ויעשו שתי משבצת זהב ושתי טבעת זהב ויתנו את שתי הטבעת על שני קצות החשן
Exo 39:17 יז ויתנו שתי העבתת הזהב על שתי הטבעת--על קצות החשן
Exo 39:18 יח ואת שתי קצות שתי העבתת נתנו על שתי המשבצת ויתנם על כתפת האפד אל מול פניו
Exo 39:19 יט ויעשו שתי טבעת זהב וישימו על שני קצות החשן  על שפתו--אשר אל עבר האפד ביתה
Exo 39:20 כ ויעשו שתי טבעת זהב ויתנם על שתי כתפת האפד מלמטה ממול פניו לעמת מחברתו--ממעל לחשב האפד
Exo 39:21 כא וירכסו את החשן מטבעתיו אל טבעת האפד בפתיל תכלת להית על חשב האפד ולא יזח החשן מעל האפד--כאשר צוה יהוה את משה  {פ}
Exo 39:22 כב ויעש את מעיל האפד מעשה ארג כליל תכלת
Exo 39:23 כג ופי המעיל בתוכו כפי תחרא שפה לפיו סביב לא יקרע
Exo 39:24 כד ויעשו על שולי המעיל רמוני תכלת וארגמן ותולעת שני--משזר
Exo 39:25 כה ויעשו פעמני זהב טהור ויתנו את הפעמנים בתוך הרמנים על שולי המעיל סביב--בתוך הרמנים
Exo 39:26 כו פעמן ורמן פעמן ורמן על שולי המעיל סביב לשרת כאשר צוה יהוה את משה  {ס}
Exo 39:27 כז ויעשו את הכתנת שש מעשה ארג לאהרן ולבניו
Exo 39:28 כח ואת המצנפת שש ואת פארי המגבעת שש ואת מכנסי הבד שש משזר
Exo 39:29 כט ואת האבנט שש משזר ותכלת וארגמן ותולעת שני--מעשה רקם  כאשר צוה יהוה את משה  {ס}
Exo 39:30 ל ויעשו את ציץ נזר הקדש זהב טהור ויכתבו עליו מכתב פתוחי חותם--קדש ליהוה
Exo 39:31 לא ויתנו עליו פתיל תכלת לתת על המצנפת מלמעלה כאשר צוה יהוה את משה  {ס}
Exo 39:32 לב ותכל--כל עבדת משכן אהל מועד ויעשו בני ישראל--ככל אשר צוה יהוה את משה כן עשו  {פ}
Exo 39:33 לג ויביאו את המשכן אל משה את האהל ואת כל כליו קרסיו קרשיו בריחו ועמדיו ואדניו
Exo 39:34 לד ואת מכסה עורת האילם המאדמים ואת מכסה ערת התחשים ואת פרכת המסך
Exo 39:35 לה את ארון העדת ואת בדיו ואת הכפרת
Exo 39:36 לו את השלחן את כל כליו ואת לחם הפנים
Exo 39:37 לז את המנרה הטהרה את נרתיה נרת המערכה--ואת כל כליה ואת שמן המאור
Exo 39:38 לח ואת מזבח הזהב ואת שמן המשחה ואת קטרת הסמים ואת מסך פתח האהל
Exo 39:39 לט את מזבח הנחשת ואת מכבר הנחשת אשר לו את בדיו ואת כל כליו את הכיר ואת כנו
Exo 39:40 מ את קלעי החצר את עמדיה ואת אדניה ואת המסך לשער החצר את מיתריו ויתדתיה ואת כל כלי עבדת המשכן--לאהל מועד
Exo 39:41 מא את בגדי השרד לשרת בקדש את בגדי הקדש לאהרן הכהן ואת בגדי בניו לכהן
Exo 39:42 מב ככל אשר צוה יהוה את משה  כן עשו בני ישראל את כל העבדה
Exo 39:43 מג וירא משה את כל המלאכה והנה עשו אתה--כאשר צוה יהוה כן עשו ויברך אתם משה  {פ}