Exo 37:1 א ויעש בצלאל את הארן עצי שטים  אמתים וחצי ארכו ואמה וחצי רחבו ואמה וחצי קמתו
Exo 37:2 ב ויצפהו זהב טהור מבית ומחוץ ויעש לו זר זהב סביב
Exo 37:3 ג ויצק לו ארבע טבעת זהב על ארבע פעמתיו ושתי טבעת על צלעו האחת ושתי טבעת על צלעו השנית
Exo 37:4 ד ויעש בדי עצי שטים ויצף אתם זהב
Exo 37:5 ה ויבא את הבדים בטבעת על צלעת הארן לשאת את הארן
Exo 37:6 ו ויעש כפרת זהב טהור  אמתים וחצי ארכה ואמה וחצי רחבה
Exo 37:7 ז ויעש שני כרבים זהב מקשה עשה אתם משני קצות הכפרת
Exo 37:8 ח כרוב אחד מקצה מזה וכרוב אחד מקצה מזה מן הכפרת עשה את הכרבים משני קצוותו (קצותיו)
Exo 37:9 ט ויהיו הכרבים פרשי כנפים למעלה סככים בכנפיהם על הכפרת ופניהם איש אל אחיו אל הכפרת--היו פני הכרבים  {פ}
Exo 37:10 י ויעש את השלחן עצי שטים  אמתים ארכו ואמה רחבו ואמה וחצי קמתו
Exo 37:11 יא ויצף אתו זהב טהור ויעש לו זר זהב סביב
Exo 37:12 יב ויעש לו מסגרת טפח סביב ויעש זר זהב למסגרתו סביב
Exo 37:13 יג ויצק לו ארבע טבעת זהב ויתן את הטבעת על ארבע הפאת אשר לארבע רגליו
Exo 37:14 יד לעמת המסגרת היו הטבעת בתים לבדים לשאת את השלחן
Exo 37:15 טו ויעש את הבדים עצי שטים ויצף אתם זהב לשאת את השלחן
Exo 37:16 טז ויעש את הכלים אשר על השלחן את קערתיו ואת כפתיו ואת מנקיתיו ואת הקשות אשר יסך בהן--זהב טהור  {פ}
Exo 37:17 יז ויעש את המנרה זהב טהור מקשה עשה את המנרה ירכה וקנה--גביעיה כפתריה ופרחיה ממנה היו
Exo 37:18 יח וששה קנים יצאים מצדיה  שלשה קני מנרה מצדה האחד ושלשה קני מנרה מצדה השני
Exo 37:19 יט שלשה גבעים משקדים בקנה האחד כפתר ופרח ושלשה גבעים משקדים בקנה אחד כפתר ופרח כן לששת הקנים היצאים מן המנרה
Exo 37:20 כ ובמנרה ארבעה גבעים  משקדים--כפתריה ופרחיה
Exo 37:21 כא וכפתר תחת שני הקנים ממנה וכפתר תחת שני הקנים ממנה וכפתר תחת שני הקנים ממנה--לששת הקנים היצאים ממנה
Exo 37:22 כב כפתריהם וקנתם ממנה היו כלה מקשה אחת זהב טהור
Exo 37:23 כג ויעש את נרתיה שבעה ומלקחיה ומחתתיה זהב טהור
Exo 37:24 כד ככר זהב טהור עשה אתה ואת כל כליה  {פ}
Exo 37:25 כה ויעש את מזבח הקטרת עצי שטים  אמה ארכו ואמה רחבו רבוע ואמתים קמתו--ממנו היו קרנתיו
Exo 37:26 כו ויצף אתו זהב טהור את גגו ואת קירתיו סביב--ואת קרנתיו ויעש לו זר זהב סביב
Exo 37:27 כז ושתי טבעת זהב עשה לו מתחת לזרו על שתי צלעתיו על שני צדיו--לבתים לבדים לשאת אתו בהם
Exo 37:28 כח ויעש את הבדים עצי שטים ויצף אתם זהב
Exo 37:29 כט ויעש את שמן המשחה קדש ואת קטרת הסמים טהור--מעשה רקח  {ס}