Exo 24:1 א ואל משה אמר עלה אל יהוה אתה ואהרן נדב ואביהוא ושבעים מזקני ישראל והשתחויתם מרחק
Exo 24:2 ב ונגש משה לבדו אל יהוה והם לא יגשו והעם לא יעלו עמו
Exo 24:3 ג ויבא משה ויספר לעם את כל דברי יהוה ואת כל המשפטים ויען כל העם קול אחד ויאמרו כל הדברים אשר דבר יהוה נעשה
Exo 24:4 ד ויכתב משה את כל דברי יהוה וישכם בבקר ויבן מזבח תחת ההר ושתים עשרה מצבה לשנים עשר שבטי ישראל
Exo 24:5 ה וישלח את נערי בני ישראל ויעלו עלת ויזבחו זבחים שלמים ליהוה--פרים
Exo 24:6 ו ויקח משה חצי הדם וישם באגנת וחצי הדם זרק על המזבח
Exo 24:7 ז ויקח ספר הברית ויקרא באזני העם ויאמרו כל אשר דבר יהוה נעשה ונשמע
Exo 24:8 ח ויקח משה את הדם ויזרק על העם ויאמר הנה דם הברית אשר כרת יהוה עמכם על כל הדברים האלה
Exo 24:9 ט ויעל משה ואהרן--נדב ואביהוא ושבעים מזקני ישראל
Exo 24:10 י ויראו את אלהי ישראל ותחת רגליו כמעשה לבנת הספיר וכעצם השמים לטהר
Exo 24:11 יא ואל אצילי בני ישראל לא שלח ידו ויחזו את האלהים ויאכלו וישתו  {ס}
Exo 24:12 יב ויאמר יהוה אל משה עלה אלי ההרה--והיה שם ואתנה לך את לחת האבן והתורה והמצוה אשר כתבתי להורתם
Exo 24:13 יג ויקם משה ויהושע משרתו ויעל משה אל הר האלהים
Exo 24:14 יד ואל הזקנים אמר שבו לנו בזה עד אשר נשוב אליכם והנה אהרן וחור עמכם מי בעל דברים יגש אלהם
Exo 24:15 טו ויעל משה אל ההר ויכס הענן את ההר
Exo 24:16 טז וישכן כבוד יהוה על הר סיני ויכסהו הענן ששת ימים ויקרא אל משה ביום השביעי מתוך הענן
Exo 24:17 יז ומראה כבוד יהוה כאש אכלת בראש ההר לעיני בני ישראל
Exo 24:18 יח ויבא משה בתוך הענן ויעל אל ההר ויהי משה בהר ארבעים יום וארבעים לילה  {פ}