Gen 31:1 א וישמע את דברי בני לבן לאמר לקח יעקב את כל אשר לאבינו ומאשר לאבינו--עשה את כל הכבד הזה
Gen 31:2 ב וירא יעקב את פני לבן והנה איננו עמו כתמול שלשום
Gen 31:3 ג ויאמר יהוה אל יעקב שוב אל ארץ אבותיך ולמולדתך ואהיה עמך
Gen 31:4 ד וישלח יעקב ויקרא לרחל וללאה השדה אל צאנו
Gen 31:5 ה ויאמר להן ראה אנכי את פני אביכן כי איננו אלי כתמל שלשם ואלהי אבי היה עמדי
Gen 31:6 ו ואתנה ידעתן  כי בכל כחי עבדתי את אביכן
Gen 31:7 ז ואביכן התל בי והחלף את משכרתי עשרת מנים ולא נתנו אלהים להרע עמדי
Gen 31:8 ח אם כה יאמר נקדים יהיה שכרך--וילדו כל הצאן נקדים ואם כה יאמר עקדים יהיה שכרך--וילדו כל הצאן עקדים
Gen 31:9 ט ויצל אלהים את מקנה אביכם ויתן לי
Gen 31:10 י ויהי בעת יחם הצאן ואשא עיני וארא בחלום והנה העתדים העלים על הצאן עקדים נקדים וברדים
Gen 31:11 יא ויאמר אלי מלאך האלהים בחלום--יעקב ואמר הנני
Gen 31:12 יב ויאמר שא נא עיניך וראה כל העתדים העלים על הצאן עקדים נקדים וברדים  כי ראיתי את כל אשר לבן עשה לך
Gen 31:13 יג אנכי האל בית אל אשר משחת שם מצבה אשר נדרת לי שם נדר עתה קום צא מן הארץ הזאת ושוב אל ארץ מולדתך
Gen 31:14 יד ותען רחל ולאה ותאמרנה לו  העוד לנו חלק ונחלה בבית אבינו
Gen 31:15 טו הלוא נכריות נחשבנו לו כי מכרנו ויאכל גם אכול את כספנו
Gen 31:16 טז כי כל העשר אשר הציל אלהים מאבינו--לנו הוא ולבנינו ועתה כל אשר אמר אלהים אליך--עשה
Gen 31:17 יז ויקם יעקב וישא את בניו ואת נשיו על הגמלים
Gen 31:18 יח וינהג את כל מקנהו ואת כל רכשו אשר רכש--מקנה קנינו אשר רכש בפדן ארם  לבוא אל יצחק אביו ארצה כנען
Gen 31:19 יט ולבן הלך לגזז את צאנו ותגנב רחל את התרפים אשר לאביה
Gen 31:20 כ ויגנב יעקב את לב לבן הארמי--על בלי הגיד לו כי ברח הוא
Gen 31:21 כא ויברח הוא וכל אשר לו ויקם ויעבר את הנהר וישם את פניו הר הגלעד
Gen 31:22 כב ויגד ללבן ביום השלישי  כי ברח יעקב
Gen 31:23 כג ויקח את אחיו עמו וירדף אחריו דרך שבעת ימים וידבק אתו בהר הגלעד
Gen 31:24 כד ויבא אלהים אל לבן הארמי בחלם הלילה ויאמר לו השמר לך פן תדבר עם יעקב--מטוב עד רע
Gen 31:25 כה וישג לבן את יעקב ויעקב תקע את אהלו בהר ולבן תקע את אחיו בהר הגלעד
Gen 31:26 כו ויאמר לבן ליעקב מה עשית ותגנב את לבבי ותנהג את בנתי כשביות חרב
Gen 31:27 כז למה נחבאת לברח ותגנב אתי ולא הגדת לי ואשלחך בשמחה ובשרים בתף ובכנור
Gen 31:28 כח ולא נטשתני לנשק לבני ולבנתי עתה הסכלת עשו
Gen 31:29 כט יש לאל ידי לעשות עמכם רע ואלהי אביכם אמש אמר אלי לאמר השמר לך מדבר עם יעקב--מטוב עד רע
Gen 31:30 ל ועתה הלך הלכת כי נכסף נכספתה לבית אביך למה גנבת את אלהי
Gen 31:31 לא ויען יעקב ויאמר ללבן  כי יראתי--כי אמרתי פן תגזל את בנותיך מעמי
Gen 31:32 לב עם אשר תמצא את אלהיך לא יחיה--נגד אחינו הכר לך מה עמדי וקח לך ולא ידע יעקב כי רחל גנבתם
Gen 31:33 לג ויבא לבן באהל יעקב ובאהל לאה ובאהל שתי האמהת--ולא מצא ויצא מאהל לאה ויבא באהל רחל
Gen 31:34 לד ורחל לקחה את התרפים ותשמם בכר הגמל--ותשב עליהם וימשש לבן את כל האהל ולא מצא
Gen 31:35 לה ותאמר אל אביה אל יחר בעיני אדני כי לוא אוכל לקום מפניך כי דרך נשים לי ויחפש ולא מצא את התרפים
Gen 31:36 לו ויחר ליעקב וירב בלבן ויען יעקב ויאמר ללבן מה פשעי מה חטאתי כי דלקת אחרי
Gen 31:37 לז כי מששת את כל כלי מה מצאת מכל כלי ביתך--שים כה נגד אחי ואחיך ויוכיחו בין שנינו
Gen 31:38 לח זה עשרים שנה אנכי עמך רחליך ועזיך לא שכלו ואילי צאנך לא אכלתי
Gen 31:39 לט טרפה לא הבאתי אליך--אנכי אחטנה מידי תבקשנה גנבתי יום וגנבתי לילה
Gen 31:40 מ הייתי ביום אכלני חרב וקרח בלילה ותדד שנתי מעיני
Gen 31:41 מא זה לי עשרים שנה בביתך עבדתיך ארבע עשרה שנה בשתי בנתיך ושש שנים בצאנך ותחלף את משכרתי עשרת מנים
Gen 31:42 מב לולי אלהי אבי אלהי אברהם ופחד יצחק היה לי--כי עתה ריקם שלחתני את עניי ואת יגיע כפי ראה אלהים--ויוכח אמש
Gen 31:43 מג ויען לבן ויאמר אל יעקב הבנות בנתי והבנים בני והצאן צאני וכל אשר אתה ראה לי הוא ולבנתי מה אעשה לאלה היום או לבניהן אשר ילדו
Gen 31:44 מד ועתה לכה נכרתה ברית--אני ואתה והיה לעד ביני ובינך
Gen 31:45 מה ויקח יעקב אבן וירימה מצבה
Gen 31:46 מו ויאמר יעקב לאחיו לקטו אבנים ויקחו אבנים ויעשו גל ויאכלו שם על הגל
Gen 31:47 מז ויקרא לו לבן יגר שהדותא ויעקב קרא לו גלעד
Gen 31:48 מח ויאמר לבן הגל הזה עד ביני ובינך היום על כן קרא שמו גלעד
Gen 31:49 מט והמצפה אשר אמר יצף יהוה ביני ובינך  כי נסתר איש מרעהו
Gen 31:50 נ אם תענה את בנתי ואם תקח נשים על בנתי--אין איש עמנו ראה אלהים עד ביני ובינך
Gen 31:51 נא ויאמר לבן ליעקב  הנה הגל הזה והנה המצבה אשר יריתי ביני ובינך
Gen 31:52 נב עד הגל הזה ועדה המצבה  אם אני לא אעבר אליך את הגל הזה ואם אתה לא תעבר אלי את הגל הזה ואת המצבה הזאת לרעה
Gen 31:53 נג אלהי אברהם ואלהי נחור ישפטו בינינו--אלהי אביהם וישבע יעקב בפחד אביו יצחק
Gen 31:54 נד ויזבח יעקב זבח בהר ויקרא לאחיו לאכל לחם ויאכלו לחם וילינו בהר
Gen 31:55