Gen 29:1 א וישא יעקב רגליו וילך ארצה בני קדם
Gen 29:2 ב וירא והנה באר בשדה והנה שם שלשה עדרי צאן רבצים עליה--כי מן הבאר ההוא ישקו העדרים והאבן גדלה על פי הבאר
Gen 29:3 ג ונאספו שמה כל העדרים וגללו את האבן מעל פי הבאר והשקו את הצאן והשיבו את האבן על פי הבאר למקמה
Gen 29:4 ד ויאמר להם יעקב אחי מאין אתם ויאמרו מחרן אנחנו
Gen 29:5 ה ויאמר להם הידעתם את לבן בן נחור ויאמרו ידענו
Gen 29:6 ו ויאמר להם השלום לו ויאמרו שלום--והנה רחל בתו באה עם הצאן
Gen 29:7 ז ויאמר הן עוד היום גדול--לא עת האסף המקנה השקו הצאן ולכו רעו
Gen 29:8 ח ויאמרו לא נוכל עד אשר יאספו כל העדרים וגללו את האבן מעל פי הבאר והשקינו הצאן
Gen 29:9 ט עודנו מדבר עמם ורחל באה עם הצאן אשר לאביה--כי רעה הוא
Gen 29:10 י ויהי כאשר ראה יעקב את רחל בת לבן אחי אמו ואת צאן לבן אחי אמו ויגש יעקב ויגל את האבן מעל פי הבאר וישק את צאן לבן אחי אמו
Gen 29:11 יא וישק יעקב לרחל וישא את קלו ויבך
Gen 29:12 יב ויגד יעקב לרחל כי אחי אביה הוא וכי בן רבקה הוא ותרץ ותגד לאביה
Gen 29:13 יג ויהי כשמע לבן את שמע יעקב בן אחתו וירץ לקראתו ויחבק לו וינשק לו ויביאהו אל ביתו ויספר ללבן את כל הדברים האלה
Gen 29:14 יד ויאמר לו לבן אך עצמי ובשרי אתה וישב עמו חדש ימים
Gen 29:15 טו ויאמר לבן ליעקב הכי אחי אתה ועבדתני חנם הגידה לי מה משכרתך
Gen 29:16 טז וללבן שתי בנות  שם הגדלה לאה ושם הקטנה רחל
Gen 29:17 יז ועיני לאה רכות ורחל היתה יפת תאר ויפת מראה
Gen 29:18 יח ויאהב יעקב את רחל ויאמר אעבדך שבע שנים ברחל בתך הקטנה
Gen 29:19 יט ויאמר לבן טוב תתי אתה לך מתתי אתה לאיש אחר שבה עמדי
Gen 29:20 כ ויעבד יעקב ברחל שבע שנים ויהיו בעיניו כימים אחדים באהבתו אתה
Gen 29:21 כא ויאמר יעקב אל לבן הבה את אשתי כי מלאו ימי ואבואה אליה
Gen 29:22 כב ויאסף לבן את כל אנשי המקום ויעש משתה
Gen 29:23 כג ויהי בערב--ויקח את לאה בתו ויבא אתה אליו ויבא אליה
Gen 29:24 כד ויתן לבן לה את זלפה שפחתו--ללאה בתו שפחה
Gen 29:25 כה ויהי בבקר והנה הוא לאה ויאמר אל לבן מה זאת עשית לי--הלא ברחל עבדתי עמך ולמה רמיתני
Gen 29:26 כו ויאמר לבן לא יעשה כן במקומנו--לתת הצעירה לפני הבכירה
Gen 29:27 כז מלא שבע זאת ונתנה לך גם את זאת בעבדה אשר תעבד עמדי עוד שבע שנים אחרות
Gen 29:28 כח ויעש יעקב כן וימלא שבע זאת ויתן לו את רחל בתו לו לאשה
Gen 29:29 כט ויתן לבן לרחל בתו את בלהה שפחתו--לה לשפחה
Gen 29:30 ל ויבא גם אל רחל ויאהב גם את רחל מלאה ויעבד עמו עוד שבע שנים אחרות
Gen 29:31 לא וירא יהוה כי שנואה לאה ויפתח את רחמה ורחל עקרה
Gen 29:32 לב ותהר לאה ותלד בן ותקרא שמו ראובן  כי אמרה כי ראה יהוה בעניי--כי עתה יאהבני אישי
Gen 29:33 לג ותהר עוד ותלד בן ותאמר כי שמע יהוה כי שנואה אנכי ויתן לי גם את זה ותקרא שמו שמעון
Gen 29:34 לד ותהר עוד ותלד בן ותאמר עתה הפעם ילוה אישי אלי כי ילדתי לו שלשה בנים על כן קרא שמו לוי
Gen 29:35 לה ותהר עוד ותלד בן ותאמר הפעם אודה את יהוה--על כן קראה שמו יהודה ותעמד מלדת