Gen 18:1 א וירא אליו יהוה באלני ממרא והוא ישב פתח האהל כחם היום
Gen 18:2 ב וישא עיניו וירא והנה שלשה אנשים נצבים עליו וירא וירץ לקראתם מפתח האהל וישתחו ארצה
Gen 18:3 ג ויאמר  אדני אם נא מצאתי חן בעיניך--אל נא תעבר מעל עבדך
Gen 18:4 ד יקח נא מעט מים ורחצו רגליכם והשענו תחת העץ
Gen 18:5 ה ואקחה פת לחם וסעדו לבכם אחר תעברו--כי על כן עברתם על עבדכם ויאמרו כן תעשה כאשר דברת
Gen 18:6 ו וימהר אברהם האהלה אל שרה ויאמר מהרי שלש סאים קמח סלת--לושי ועשי עגות
Gen 18:7 ז ואל הבקר רץ אברהם ויקח בן בקר רך וטוב ויתן אל הנער וימהר לעשות אתו
Gen 18:8 ח ויקח חמאה וחלב ובן הבקר אשר עשה ויתן לפניהם והוא עמד עליהם תחת העץ ויאכלו
Gen 18:9 ט ויאמרו אליו איה שרה אשתך ויאמר הנה באהל
Gen 18:10 י ויאמר שוב אשוב אליך כעת חיה והנה בן לשרה אשתך ושרה שמעת פתח האהל והוא אחריו
Gen 18:11 יא ואברהם ושרה זקנים באים בימים חדל להיות לשרה ארח כנשים
Gen 18:12 יב ותצחק שרה בקרבה לאמר  אחרי בלתי היתה לי עדנה ואדני זקן
Gen 18:13 יג ויאמר יהוה אל אברהם  למה זה צחקה שרה לאמר האף אמנם אלד--ואני זקנתי
Gen 18:14 יד היפלא מיהוה דבר למועד אשוב אליך כעת חיה--ולשרה בן
Gen 18:15 טו ותכחש שרה לאמר לא צחקתי כי יראה ויאמר לא כי צחקת
Gen 18:16 טז ויקמו משם האנשים וישקפו על פני סדם ואברהם--הלך עמם לשלחם
Gen 18:17 יז ויהוה אמר  המכסה אני מאברהם אשר אני עשה
Gen 18:18 יח ואברהם--היו יהיה לגוי גדול ועצום ונברכו בו--כל גויי הארץ
Gen 18:19 יט כי ידעתיו למען אשר יצוה את בניו ואת ביתו אחריו ושמרו דרך יהוה לעשות צדקה ומשפט--למען הביא יהוה על אברהם את אשר דבר עליו
Gen 18:20 כ ויאמר יהוה זעקת סדם ועמרה כי רבה וחטאתם--כי כבדה מאד
Gen 18:21 כא ארדה נא ואראה הכצעקתה הבאה אלי עשו כלה ואם לא אדעה
Gen 18:22 כב ויפנו משם האנשים וילכו סדמה ואברהם--עודנו עמד לפני יהוה
Gen 18:23 כג ויגש אברהם ויאמר  האף תספה צדיק עם רשע
Gen 18:24 כד אולי יש חמשים צדיקם בתוך העיר האף תספה ולא תשא למקום למען חמשים הצדיקם אשר בקרבה
Gen 18:25 כה חללה לך מעשת כדבר הזה להמית צדיק עם רשע והיה כצדיק כרשע חללה לך--השפט כל הארץ לא יעשה משפט
Gen 18:26 כו ויאמר יהוה אם אמצא בסדם חמשים צדיקם בתוך העיר--ונשאתי לכל המקום בעבורם
Gen 18:27 כז ויען אברהם ויאמר  הנה נא הואלתי לדבר אל אדני ואנכי עפר ואפר
Gen 18:28 כח אולי יחסרון חמשים הצדיקם חמשה--התשחית בחמשה את כל העיר ויאמר לא אשחית אם אמצא שם ארבעים וחמשה
Gen 18:29 כט ויסף עוד לדבר אליו ויאמר אולי ימצאון שם ארבעים ויאמר לא אעשה בעבור הארבעים
Gen 18:30 ל ויאמר אל נא יחר לאדני ואדברה--אולי ימצאון שם שלשים ויאמר לא אעשה אם אמצא שם שלשים
Gen 18:31 לא ויאמר הנה נא הואלתי לדבר אל אדני--אולי ימצאון שם עשרים ויאמר לא אשחית בעבור העשרים
Gen 18:32 לב ויאמר אל נא יחר לאדני ואדברה אך הפעם--אולי ימצאון שם עשרה ויאמר לא אשחית בעבור העשרה
Gen 18:33 לג וילך יהוה--כאשר כלה לדבר אל אברהם ואברהם שב למקמו