Gen 14:1 א ויהי בימי אמרפל מלך שנער אריוך מלך אלסר כדרלעמר מלך עילם ותדעל מלך גוים
Gen 14:2 ב עשו מלחמה את ברע מלך סדם ואת ברשע מלך עמרה שנאב מלך אדמה ושמאבר מלך צביים ומלך בלע היא צער
Gen 14:3 ג כל אלה חברו אל עמק השדים  הוא ים המלח
Gen 14:4 ד שתים עשרה שנה עבדו את כדרלעמר ושלש עשרה שנה מרדו
Gen 14:5 ה ובארבע עשרה שנה בא כדרלעמר והמלכים אשר אתו ויכו את רפאים בעשתרת קרנים ואת הזוזים בהם ואת האימים בשוה קריתים
Gen 14:6 ו ואת החרי בהררם שעיר עד איל פארן אשר על המדבר
Gen 14:7 ז וישבו ויבאו אל עין משפט הוא קדש ויכו את כל שדה העמלקי--וגם את האמרי הישב בחצצן תמר
Gen 14:8 ח ויצא מלך סדם ומלך עמרה ומלך אדמה ומלך צביים ומלך בלע הוא צער ויערכו אתם מלחמה בעמק השדים
Gen 14:9 ט את כדרלעמר מלך עילם ותדעל מלך גוים ואמרפל מלך שנער ואריוך מלך אלסר--ארבעה מלכים את החמשה
Gen 14:10 י ועמק השדים בארת בארת חמר וינסו מלך סדם ועמרה ויפלו שמה והנשארים הרה נסו
Gen 14:11 יא ויקחו את כל רכש סדם ועמרה ואת כל אכלם--וילכו
Gen 14:12 יב ויקחו את לוט ואת רכשו בן אחי אברם וילכו והוא ישב בסדם
Gen 14:13 יג ויבא הפליט ויגד לאברם העברי והוא שכן באלני ממרא האמרי אחי אשכל ואחי ענר והם בעלי ברית אברם
Gen 14:14 יד וישמע אברם כי נשבה אחיו וירק את חניכיו ילידי ביתו שמנה עשר ושלש מאות וירדף עד דן
Gen 14:15 טו ויחלק עליהם לילה הוא ועבדיו ויכם וירדפם עד חובה אשר משמאל לדמשק
Gen 14:16 טז וישב את כל הרכש וגם את לוט אחיו ורכשו השיב וגם את הנשים ואת העם
Gen 14:17 יז ויצא מלך סדם לקראתו אחרי שובו מהכות את כדרלעמר ואת המלכים אשר אתו--אל עמק שוה הוא עמק המלך
Gen 14:18 יח ומלכי צדק מלך שלם הוציא לחם ויין והוא כהן לאל עליון
Gen 14:19 יט ויברכהו ויאמר  ברוך אברם לאל עליון קנה שמים וארץ
Gen 14:20 כ וברוך אל עליון אשר מגן צריך בידך ויתן לו מעשר מכל
Gen 14:21 כא ויאמר מלך סדם אל אברם  תן לי הנפש והרכש קח לך
Gen 14:22 כב ויאמר אברם אל מלך סדם  הרמתי ידי אל יהוה אל עליון קנה שמים וארץ
Gen 14:23 כג אם מחוט ועד שרוך נעל ואם אקח מכל אשר לך ולא תאמר אני העשרתי את אברם
Gen 14:24 כד בלעדי רק אשר אכלו הנערים וחלק האנשים אשר הלכו אתי  ענר אשכל וממרא הם יקחו חלקם  {ס}