Gen 13:1 א ויעל אברם ממצרים הוא ואשתו וכל אשר לו ולוט עמו--הנגבה
Gen 13:2 ב ואברם כבד מאד במקנה בכסף ובזהב
Gen 13:3 ג וילך למסעיו מנגב ועד בית אל--עד המקום אשר היה שם אהלה בתחלה בין בית אל ובין העי
Gen 13:4 ד אל מקום המזבח אשר עשה שם בראשנה ויקרא שם אברם בשם יהוה
Gen 13:5 ה וגם ללוט--ההלך את אברם  היה צאן ובקר ואהלים
Gen 13:6 ו ולא נשא אתם הארץ לשבת יחדו  כי היה רכושם רב ולא יכלו לשבת יחדו
Gen 13:7 ז ויהי ריב בין רעי מקנה אברם ובין רעי מקנה לוט והכנעני והפרזי אז ישב בארץ
Gen 13:8 ח ויאמר אברם אל לוט אל נא תהי מריבה ביני ובינך ובין רעי ובין רעיך  כי אנשים אחים אנחנו
Gen 13:9 ט הלא כל הארץ לפניך הפרד נא מעלי  אם השמאל ואימנה ואם הימין ואשמאילה
Gen 13:10 י וישא לוט את עיניו וירא את כל ככר הירדן כי כלה משקה--לפני שחת יהוה את סדם ואת עמרה כגן יהוה כארץ מצרים באכה צער
Gen 13:11 יא ויבחר לו לוט את כל ככר הירדן ויסע לוט מקדם ויפרדו איש מעל אחיו
Gen 13:12 יב אברם ישב בארץ כנען ולוט ישב בערי הככר ויאהל עד סדם
Gen 13:13 יג ואנשי סדם רעים וחטאים ליהוה מאד
Gen 13:14 יד ויהוה אמר אל אברם אחרי הפרד לוט מעמו שא נא עיניך וראה מן המקום אשר אתה שם--צפנה ונגבה וקדמה וימה
Gen 13:15 טו כי את כל הארץ אשר אתה ראה לך אתננה ולזרעך עד עולם
Gen 13:16 טז ושמתי את זרעך כעפר הארץ  אשר אם יוכל איש למנות את עפר הארץ--גם זרעך ימנה
Gen 13:17 יז קום התהלך בארץ לארכה ולרחבה  כי לך אתננה
Gen 13:18 יח ויאהל אברם ויבא וישב באלני ממרא--אשר בחברון ויבן שם מזבח ליהוה  {פ}