Gen 4:1 א והאדם ידע את חוה אשתו ותהר ותלד את קין ותאמר קניתי איש את יהוה
Gen 4:2 ב ותסף ללדת את אחיו את הבל ויהי הבל רעה צאן וקין היה עבד אדמה
Gen 4:3 ג ויהי מקץ ימים ויבא קין מפרי האדמה מנחה--ליהוה
Gen 4:4 ד והבל הביא גם הוא מבכרות צאנו ומחלבהן וישע יהוה אל הבל ואל מנחתו
Gen 4:5 ה ואל קין ואל מנחתו לא שעה ויחר לקין מאד ויפלו פניו
Gen 4:6 ו ויאמר יהוה אל קין  למה חרה לך ולמה נפלו פניך
Gen 4:7 ז הלוא אם תיטיב שאת ואם לא תיטיב לפתח חטאת רבץ ואליך תשוקתו ואתה תמשל בו
Gen 4:8 ח ויאמר קין אל הבל אחיו ויהי בהיותם בשדה ויקם קין אל הבל אחיו ויהרגהו
Gen 4:9 ט ויאמר יהוה אל קין אי הבל אחיך ויאמר לא ידעתי השמר אחי אנכי
Gen 4:10 י ויאמר מה עשית קול דמי אחיך צעקים אלי מן האדמה
Gen 4:11 יא ועתה ארור אתה מן האדמה אשר פצתה את פיה לקחת את דמי אחיך מידך
Gen 4:12 יב כי תעבד את האדמה לא תסף תת כחה לך נע ונד תהיה בארץ
Gen 4:13 יג ויאמר קין אל יהוה  גדול עוני מנשא
Gen 4:14 יד הן גרשת אתי היום מעל פני האדמה ומפניך אסתר והייתי נע ונד בארץ והיה כל מצאי יהרגני
Gen 4:15 טו ויאמר לו יהוה לכן כל הרג קין שבעתים יקם וישם יהוה לקין אות לבלתי הכות אתו כל מצאו
Gen 4:16 טז ויצא קין מלפני יהוה וישב בארץ נוד קדמת עדן
Gen 4:17 יז וידע קין את אשתו ותהר ותלד את חנוך ויהי בנה עיר ויקרא שם העיר כשם בנו חנוך
Gen 4:18 יח ויולד לחנוך את עירד ועירד ילד את מחויאל ומחייאל ילד את מתושאל ומתושאל ילד את למך
Gen 4:19 יט ויקח לו למך שתי נשים  שם האחת עדה ושם השנית צלה
Gen 4:20 כ ותלד עדה את יבל  הוא היה--אבי ישב אהל ומקנה
Gen 4:21 כא ושם אחיו יובל  הוא היה--אבי כל תפש כנור ועוגב
Gen 4:22 כב וצלה גם הוא ילדה את תובל קין--לטש כל חרש נחשת וברזל ואחות תובל קין נעמה
Gen 4:23 כג ויאמר למך לנשיו עדה וצלה שמען קולי--נשי למך האזנה אמרתי  כי איש הרגתי לפצעי וילד לחברתי
Gen 4:24 כד כי שבעתים יקם קין ולמך שבעים ושבעה
Gen 4:25 כה וידע אדם עוד את אשתו ותלד בן ותקרא את שמו שת  כי שת לי אלהים זרע אחר--תחת הבל כי הרגו קין
Gen 4:26 כו ולשת גם הוא ילד בן ויקרא את שמו אנוש אז הוחל לקרא בשם יהוה  {ס}