Joh 16:1 haec locutus sum vobis ut non scandalizemini
Joh 16:2 absque synagogis facient vos sed venit hora ut omnis qui interficit vos arbitretur obsequium se praestare Deo
Joh 16:3 et haec facient quia non noverunt Patrem neque me
The Work of the Holy Spirit
Joh 16:4 sed haec locutus sum vobis ut cum venerit hora eorum reminiscamini quia ego dixi vobis
Joh 16:5 haec autem vobis ab initio non dixi quia vobiscum eram at nunc vado ad eum qui me misit et nemo ex vobis interrogat me quo vadis
Joh 16:6 sed quia haec locutus sum vobis tristitia implevit cor vestrum
Joh 16:7 sed ego veritatem dico vobis expedit vobis ut ego vadam si enim non abiero paracletus non veniet ad vos si autem abiero mittam eum ad vos
Joh 16:8 et cum venerit ille arguet mundum de peccato et de iustitia et de iudicio
Joh 16:9 de peccato quidem quia non credunt in me
Joh 16:10 de iustitia vero quia ad Patrem vado et iam non videbitis me
Joh 16:11 de iudicio autem quia princeps mundi huius iudicatus est
Joh 16:12 adhuc multa habeo vobis dicere sed non potestis portare modo
Joh 16:13 cum autem venerit ille Spiritus veritatis docebit vos in omnem veritatem non enim loquetur a semet ipso sed quaecumque audiet loquetur et quae ventura sunt adnuntiabit vobis
Joh 16:14 ille me clarificabit quia de meo accipiet et adnuntiabit vobis
Joh 16:15 omnia quaecumque habet Pater mea sunt propterea dixi quia de meo accipit et adnuntiabit vobis
Your Sorrow Will Turn into Joy
Joh 16:16 modicum et iam non videbitis me et iterum modicum et videbitis me quia vado ad Patrem
Joh 16:17 dixerunt ergo ex discipulis eius ad invicem quid est hoc quod dicit nobis modicum et non videbitis me et iterum modicum et videbitis me et quia vado ad Patrem
Joh 16:18 dicebant ergo quid est hoc quod dicit modicum nescimus quid loquitur
Joh 16:19 cognovit autem Iesus quia volebant eum interrogare et dixit eis de hoc quaeritis inter vos quia dixi modicum et non videbitis me et iterum modicum et videbitis me
Joh 16:20 amen amen dico vobis quia plorabitis et flebitis vos mundus autem gaudebit vos autem contristabimini sed tristitia vestra vertetur in gaudium
Joh 16:21 mulier cum parit tristitiam habet quia venit hora eius cum autem pepererit puerum iam non meminit pressurae propter gaudium quia natus est homo in mundum
Joh 16:22 et vos igitur nunc quidem tristitiam habetis iterum autem videbo vos et gaudebit cor vestrum et gaudium vestrum nemo tollit a vobis
Joh 16:23 et in illo die me non rogabitis quicquam amen amen dico vobis si quid petieritis Patrem in nomine meo dabit vobis
Joh 16:24 usque modo non petistis quicquam in nomine meo petite et accipietis ut gaudium vestrum sit plenum
I Have Overcome the World
Joh 16:25 haec in proverbiis locutus sum vobis venit hora cum iam non in proverbiis loquar vobis sed palam de Patre adnuntiabo vobis
Joh 16:26 illo die in nomine meo petetis et non dico vobis quia ego rogabo Patrem de vobis
Joh 16:27 ipse enim Pater amat vos quia vos me amastis et credidistis quia ego a Deo exivi
Joh 16:28 exivi a Patre et veni in mundum iterum relinquo mundum et vado ad Patrem
Joh 16:29 dicunt ei discipuli eius ecce nunc palam loqueris et proverbium nullum dicis
Joh 16:30 nunc scimus quia scis omnia et non opus est tibi ut quis te interroget in hoc credimus quia a Deo existi
Joh 16:31 respondit eis Iesus modo creditis
Joh 16:32 ecce venit hora et iam venit ut dispergamini unusquisque in propria et me solum relinquatis et non sum solus quia Pater mecum est
Joh 16:33 haec locutus sum vobis ut in me pacem habeatis in mundo pressuram habetis sed confidite ego vici mundum