The Widow's Offering
Luk 21:1 respiciens autem vidit eos qui mittebant munera sua in gazofilacium divites
Luk 21:2 vidit autem et quandam viduam pauperculam mittentem aera minuta duo
Luk 21:3 et dixit vere dico vobis quia vidua haec pauper plus quam omnes misit
Luk 21:4 nam omnes hii ex abundanti sibi miserunt in munera Dei haec autem ex eo quod deest illi omnem victum suum quem habuit misit
Jesus Foretells Destruction of the Temple
Luk 21:5 et quibusdam dicentibus de templo quod lapidibus bonis et donis ornatum esset dixit
Luk 21:6 haec quae videtis venient dies in quibus non relinquetur lapis super lapidem qui non destruatur
Luk 21:7 interrogaverunt autem illum dicentes praeceptor quando haec erunt et quod signum cum fieri incipient
Luk 21:8 qui dixit videte ne seducamini multi enim venient in nomine meo dicentes quia ego sum et tempus adpropinquavit nolite ergo ire post illos
Luk 21:9 cum autem audieritis proelia et seditiones nolite terreri oportet primum haec fieri sed non statim finis
Jesus Foretells Wars and Persecution
Luk 21:10 tunc dicebat illis surget gens contra gentem et regnum adversus regnum
Luk 21:11 terraemotus magni erunt per loca et pestilentiae et fames terroresque de caelo et signa magna erunt
Luk 21:12 sed ante haec omnia inicient vobis manus suas et persequentur tradentes in synagogas et custodias trahentes ad reges et praesides propter nomen meum
Luk 21:13 continget autem vobis in testimonium
Luk 21:14 ponite ergo in cordibus vestris non praemeditari quemadmodum respondeatis
Luk 21:15 ego enim dabo vobis os et sapientiam cui non poterunt resistere et contradicere omnes adversarii vestri
Luk 21:16 trademini autem a parentibus et fratribus et cognatis et amicis et morte adficient ex vobis
Luk 21:17 et eritis odio omnibus propter nomen meum
Luk 21:18 et capillus de capite vestro non peribit
Luk 21:19 in patientia vestra possidebitis animas vestras
Jesus Foretells Destruction of Jerusalem
Luk 21:20 cum autem videritis circumdari ab exercitu Hierusalem tunc scitote quia adpropinquavit desolatio eius
Luk 21:21 tunc qui in Iudaea sunt fugiant in montes et qui in medio eius discedant et qui in regionibus non intrent in eam
Luk 21:22 quia dies ultionis hii sunt ut impleantur omnia quae scripta sunt
Luk 21:23 vae autem praegnatibus et nutrientibus in illis diebus erit enim pressura magna supra terram et ira populo huic
Luk 21:24 et cadent in ore gladii et captivi ducentur in omnes gentes et Hierusalem calcabitur a gentibus donec impleantur tempora nationum
The Coming of the Son of Man
Luk 21:25 et erunt signa in sole et luna et stellis et in terris pressura gentium prae confusione sonitus maris et fluctuum
Luk 21:26 arescentibus hominibus prae timore et expectatione quae supervenient universo orbi nam virtutes caelorum movebuntur
Luk 21:27 et tunc videbunt Filium hominis venientem in nube cum potestate magna et maiestate
Luk 21:28 his autem fieri incipientibus respicite et levate capita vestra quoniam adpropinquat redemptio vestra
The Lesson of the Fig Tree
Luk 21:29 et dixit illis similitudinem videte ficulneam et omnes arbores
Luk 21:30 cum producunt iam ex se fructum scitis quoniam prope est aestas
Luk 21:31 ita et vos cum videritis haec fieri scitote quoniam prope est regnum Dei
Luk 21:32 amen dico vobis quia non praeteribit generatio haec donec omnia fiant
Luk 21:33 caelum et terra transibunt verba autem mea non transient
Watch Yourselves
Luk 21:34 adtendite autem vobis ne forte graventur corda vestra in crapula et ebrietate et curis huius vitae et superveniat in vos repentina dies illa
Luk 21:35 tamquam laqueus enim superveniet in omnes qui sedent super faciem omnis terrae
Luk 21:36 vigilate itaque omni tempore orantes ut digni habeamini fugere ista omnia quae futura sunt et stare ante Filium hominis
Luk 21:37 erat autem diebus docens in templo noctibus vero exiens morabatur in monte qui vocatur Oliveti
Luk 21:38 et omnis populus manicabat ad eum in templo audire eum