Healing of a Man on the Sabbath
Luk 14:1  et factum est cum intraret in domum cuiusdam principis Pharisaeorum sabbato manducare panem et ipsi observabant eum
Luk 14:2  et ecce homo quidam hydropicus erat ante illum
Luk 14:3  et respondens Iesus dixit ad legis peritos et Pharisaeos dicens si licet sabbato curare
Luk 14:4  at illi tacuerunt ipse vero adprehensum sanavit eum ac dimisit
Luk 14:5  et respondens ad illos dixit cuius vestrum asinus aut bos in puteum cadet et non continuo extrahet illum die sabbati
Luk 14:6  et non poterant ad haec respondere illi
The Parable of the Wedding Feast
Luk 14:7  dicebat autem et ad invitatos parabolam intendens quomodo primos accubitus eligerent dicens ad illos
Luk 14:8  cum invitatus fueris ad nuptias non discumbas in primo loco ne forte honoratior te sit invitatus ab eo
Luk 14:9  et veniens is qui te et illum vocavit dicat tibi da huic locum et tunc incipias cum rubore novissimum locum tenere
Luk 14:10  sed cum vocatus fueris vade recumbe in novissimo loco ut cum venerit qui te invitavit dicat tibi amice ascende superius tunc erit tibi gloria coram simul discumbentibus
Luk 14:11  quia omnis qui se exaltat humiliabitur et qui se humiliat exaltabitur
The Parable of the Great Banquet
Luk 14:12  dicebat autem et ei qui se invitaverat cum facis prandium aut cenam noli vocare amicos tuos neque fratres tuos neque cognatos neque vicinos divites ne forte et ipsi te reinvitent et fiat tibi retributio
Luk 14:13  sed cum facis convivium voca pauperes debiles claudos caecos
Luk 14:14  et beatus eris quia non habent retribuere tibi retribuetur enim tibi in resurrectione iustorum
Luk 14:15  haec cum audisset quidam de simul discumbentibus dixit illi beatus qui manducabit panem in regno Dei
Luk 14:16  at ipse dixit ei homo quidam fecit cenam magnam et vocavit multos
Luk 14:17  et misit servum suum hora cenae dicere invitatis ut venirent quia iam parata sunt omnia
Luk 14:18  et coeperunt simul omnes excusare primus dixit ei villam emi et necesse habeo exire et videre illam rogo te habe me excusatum
Luk 14:19  et alter dixit iuga boum emi quinque et eo probare illa rogo te habe me excusatum
Luk 14:20  et alius dixit uxorem duxi et ideo non possum venire
Luk 14:21  et reversus servus nuntiavit haec domino suo tunc iratus pater familias dixit servo suo exi cito in plateas et vicos civitatis et pauperes ac debiles et caecos et claudos introduc huc
Luk 14:22  et ait servus domine factum est ut imperasti et adhuc locus est
Luk 14:23  et ait dominus servo exi in vias et sepes et conpelle intrare ut impleatur domus mea
Luk 14:24  dico autem vobis quod nemo virorum illorum qui vocati sunt gustabit cenam meam
The Cost of Discipleship
Luk 14:25  ibant autem turbae multae cum eo et conversus dixit ad illos
Luk 14:26  si quis venit ad me et non odit patrem suum et matrem et uxorem et filios et fratres et sorores adhuc autem et animam suam non potest esse meus discipulus
Luk 14:27  et qui non baiulat crucem suam et venit post me non potest esse meus discipulus
Luk 14:28  quis enim ex vobis volens turrem aedificare non prius sedens conputat sumptus qui necessarii sunt si habet ad perficiendum
Luk 14:29  ne posteaquam posuerit fundamentum et non potuerit perficere omnes qui vident incipiant inludere ei
Luk 14:30  dicentes quia hic homo coepit aedificare et non potuit consummare
Luk 14:31  aut qui rex iturus committere bellum adversus alium regem non sedens prius cogitat si possit cum decem milibus occurrere ei qui cum viginti milibus venit ad se
Luk 14:32  alioquin adhuc illo longe agente legationem mittens rogat ea quae pacis sunt
Luk 14:33  sic ergo omnis ex vobis qui non renuntiat omnibus quae possidet non potest meus esse discipulus
Salt Without Taste Is Worthless
Luk 14:34  bonum est sal si autem sal quoque evanuerit in quo condietur
Luk 14:35  neque in terram neque in sterquilinium utile est sed foras mittetur qui habet aures audiendi audiat