The Glory of the Lord Leaves the Temple
Eze 10:1  et vidi et ecce in firmamento quod erat super caput cherubin quasi lapis sapphyrus quasi species similitudinis solii apparuit super ea
Eze 10:2  et dixit ad virum qui indutus erat lineis et ait ingredere in medio rotarum quae sunt subtus cherub et imple manum tuam prunis ignis quae sunt inter cherubin et effunde super civitatem ingressusque est in conspectu meo
Eze 10:3  cherubin autem stabant a dextris domus cum ingrederetur vir et nubes implevit atrium interius
Eze 10:4  et elevata est gloria Domini desuper cherub ad limen domus et repleta est domus nube et atrium repletum est splendore gloriae Domini
Eze 10:5  et sonitus alarum cherubin audiebatur usque ad atrium exterius quasi vox Dei omnipotentis loquentis
Eze 10:6  cumque praecepisset viro qui indutus erat lineis dicens sume ignem de medio rotarum quae sunt inter cherubin ingressus ille stetit iuxta rotam
Eze 10:7  et extendit cherub manum de medio cherubin ad ignem qui erat inter cherubin et sumpsit et dedit in manus eius qui indutus erat lineis qui accipiens egressus est
Eze 10:8  et apparuit in cherubin similitudo manus hominis subtus pinnas eorum
Eze 10:9  et vidi et ecce quattuor rotae iuxta cherubin rota una iuxta cherub unum et rota alia iuxta cherub unum species autem erat rotarum quasi visio lapidis chrysoliti
Eze 10:10  et aspectus earum similitudo una quattuor quasi sit rota in medio rotae
Eze 10:11  cumque ambularent in quattuor partes gradiebantur non revertebantur ambulantes sed ad locum ad quem ire declinabat quae prima erat sequebantur et ceterae nec convertebantur
Eze 10:12  et omne corpus earum et colla et manus et pinnae et circuli plena erant oculis in circuitu quattuor rotarum
Eze 10:13  et rotas istas vocavit volubiles audiente me
Eze 10:14  quattuor autem facies habebat unum facies una facies cherub et facies secunda facies hominis et in tertio facies leonis et in quarto facies aquilae
Eze 10:15  et elevata sunt cherubin ipsum est animal quod videram iuxta flumen Chobar
Eze 10:16  cumque ambularent cherubin ibant pariter et rotae iuxta ea et cum levarent cherubin alas suas ut exaltarentur de terra non residebant rotae sed et ipsae iuxta erant
Eze 10:17  stantibus illis stabant et cum elevatis elevabantur spiritus enim vitae erat in eis
Eze 10:18  et egressa est gloria Domini a limine templi et stetit super cherubin
Eze 10:19  et elevantia cherubin alas suas exaltata sunt a terra coram me et illis egredientibus rotae quoque subsecutae sunt et stetit in introitu portae domus Domini orientalis et gloria Dei Israhel erat super ea
Eze 10:20  ipsum est animal quod vidi subter Deum Israhel iuxta fluvium Chobar et intellexi quia cherubin essent
Eze 10:21  quattuor per quattuor vultus uni et quattuor alae uni et similitudo manus hominis sub alis eorum
Eze 10:22  et similitudo vultuum eorum ipsi vultus quos videram iuxta fluvium Chobar et intuitus eorum et impetus singulorum ante faciem suam ingredi