Judgment Against Idolatry
Eze 6:1  et factus est sermo Domini ad me dicens
Eze 6:2  fili hominis pone faciem tuam ad montes Israhel et prophetabis ad eos
Eze 6:3  et dices montes Israhel audite verbum Domini Dei haec dicit Dominus Deus montibus et collibus rupibus et vallibus ecce ego inducam super vos gladium et disperdam excelsa vestra
Eze 6:4  et demoliar aras vestras et confringentur simulacra vestra et deiciam interfectos vestros ante idola vestra
Eze 6:5  et dabo cadavera filiorum Israhel ante faciem simulacrorum vestrorum et dispergam ossa vestra circum aras vestras
Eze 6:6  in omnibus habitationibus vestris urbes desertae erunt et excelsa demolientur et dissipabuntur et interibunt arae vestrae et confringentur et cessabunt idola vestra et conterentur delubra vestra et delebuntur opera vestra
Eze 6:7  et cadet interfectus in medio vestri et scietis quoniam ego Dominus
Eze 6:8  et relinquam in vobis eos qui fugerint gladium in gentibus cum dispersero vos in terris
Eze 6:9  et recordabuntur mei liberati vestri in gentibus ad quas captivi ducti sunt quia contrivi cor eorum fornicans et recedens a me et oculos eorum fornicantes post idola sua et displicebunt sibimet super malis quae fecerunt in universis abominationibus suis
Eze 6:10  et scient quia ego Dominus non frustra locutus sum ut facerem eis malum hoc
Eze 6:11  haec dicit Dominus Deus percute manu tua et adlide pedem tuum et dic eheu ad omnes abominationes malorum domus Israhel qui gladio fame peste ruituri sunt
Eze 6:12  qui longe est peste morietur qui autem prope gladio corruet et qui relictus fuerit et obsessus fame morietur et conpleam indignationem meam in eis
Eze 6:13  et scietis quia ego Dominus cum fuerint interfecti vestri in medio idolorum vestrorum in circuitu ararum vestrarum in omni colle excelso in cunctis summitatibus montium et subtus omne lignum nemorosum et subtus universam quercum frondosam locum ubi accenderunt tura redolentia universis idolis suis
Eze 6:14  et extendam manum meam super eos et faciam terram desolatam et destitutam a deserto Deblatha in omnibus habitationibus eorum et scient quia ego Dominus