Forsake Me Not When My Strength Is Spent
Psa 71:1  (70:1) David psalmus filiorum Ionadab et priorum captivorum in te Domine speravi non confundar in aeternum
Psa 71:2  (70:2) in iustitia tua libera me et eripe me inclina ad me aurem tuam et salva me
Psa 71:3  (70:3) esto mihi in Deum protectorem et in locum munitum ut salvum me facias quoniam firmamentum meum et refugium meum es tu
Psa 71:4  (70:4) Deus meus eripe me de manu peccatoris de manu contra legem agentis et iniqui
Psa 71:5  (70:5) quoniam tu es patientia mea Domine Domine spes mea a iuventute mea
Psa 71:6  (70:6) in te confirmatus sum ex utero de ventre matris meae tu es protector meus in te cantatio mea semper
Psa 71:7  (70:7) tamquam prodigium factus sum multis et tu adiutor fortis
Psa 71:8  (70:8) repleatur os meum laude ut cantem gloriam tuam tota die magnitudinem tuam
Psa 71:9  (70:9) non proicias me in tempore senectutis cum deficiet virtus mea ne derelinquas me
Psa 71:10  (70:10) quia dixerunt inimici mei mihi et qui custodiebant animam meam consilium fecerunt in unum
Psa 71:11  (70:11) dicentes Deus dereliquit eum persequimini et conprehendite eum quia non est qui eripiat
Psa 71:12  (70:12) Deus ne elongeris a me Deus meus in adiutorium meum respice
Psa 71:13  (70:13) confundantur et deficiant detrahentes animae meae operiantur confusione et pudore qui quaerunt mala mihi
Psa 71:14  (70:14) ego autem semper sperabo et adiciam super omnem laudem tuam
Psa 71:15  (70:15) os meum adnuntiabit iustitiam tuam tota die salutem tuam quoniam non cognovi litteraturam
Psa 71:16  (70:16) introibo in potentiam Domini Domine memorabor iustitiae tuae solius
Psa 71:17  (70:17) Deus docuisti me ex iuventute mea et usque nunc pronuntiabo mirabilia tua
Psa 71:18  (70:18) et usque in senectam et senium Deus ne derelinquas me donec adnuntiem brachium tuum generationi omni quae ventura est potentiam tuam
Psa 71:19  (70:19) et iustitiam tuam Deus usque in altissima quae fecisti magnalia Deus quis similis tibi
Psa 71:20  (70:20) quantas ostendisti mihi tribulationes multas et malas et conversus vivificasti me et de abyssis terrae iterum reduxisti me
Psa 71:21  (70:21) multiplicasti magnificentiam tuam et conversus consolatus es me
Psa 71:22  (70:22) nam et ego confitebor tibi in vasis psalmi veritatem tuam Deus psallam tibi in cithara Sanctus Israhel
Psa 71:23  (70:23) exultabunt labia mea cum cantavero tibi et anima mea quam redemisti
Psa 71:24  (70:24) sed et lingua mea tota die meditabitur iustitiam tuam cum confusi et reveriti fuerint qui quaerunt mala mihi