Deliver Me from My Enemies
Psa 59:1 (58:1) in finem ne disperdas David in tituli inscriptione quando misit Saul et custodivit domum eius ut interficeret eum (58:2) eripe me de inimicis meis Deus et ab insurgentibus in me libera me
Psa 59:2 (58:3) eripe me de operantibus iniquitatem et de viris sanguinum salva me
Psa 59:3 (58:4) quia ecce ceperunt animam meam inruerunt in me fortes
Psa 59:4 (58:5) neque iniquitas mea neque peccatum meum Domine sine iniquitate cucurri et direxi
Psa 59:5 (58:6) exsurge in occursum meum et vide et tu Domine Deus virtutum Deus Israhel intende ad visitandas omnes gentes non miserearis omnibus qui operantur iniquitatem diapsalma
Psa 59:6 (58:7) convertentur ad vesperam et famem patientur ut canes et circuibunt civitatem
Psa 59:7 (58:8) ecce loquentur in ore suo et gladius in labiis eorum quoniam quis audivit
Psa 59:8 (59:9) et tu Domine deridebis eos ad nihilum deduces omnes gentes
Psa 59:9 (58:10) fortitudinem meam ad te custodiam quia Deus susceptor meus
Psa 59:10 (58:11) Deus meus voluntas eius praeveniet me
Psa 59:11 (58:12) Deus ostendet mihi super inimicos meos ne occidas eos nequando obliviscantur populi mei disperge illos in virtute tua et depone eos protector meus Domine
Psa 59:12 (58:13) delictum oris eorum sermonem labiorum ipsorum et conprehendantur in superbia sua et de execratione et mendacio adnuntiabuntur
Psa 59:13 (58:14) in consummatione in ira consummationis et non erunt et scient quia Deus dominatur Iacob finium terrae diapsalma
Psa 59:14 (58:15) convertentur ad vesperam et famem patientur ut canes et circuibunt civitatem
Psa 59:15 (58:16) ipsi dispergentur ad manducandum si vero non fuerint saturati et murmurabunt
Psa 59:16 (58:17) ego autem cantabo fortitudinem tuam et exultabo mane misericordiam tuam quia factus es susceptor meus et refugium meum in die tribulationis meae
Psa 59:17 (58:18) adiutor meus tibi psallam quia Deus susceptor meus es Deus meus misericordia mea
