The Lord Is My Light and My Salvation

Psa 27:1 (26:1) David priusquam liniretur Dominus inluminatio mea et salus mea quem timebo Dominus protector vitae meae a quo trepidabo

Psa 27:2 (26:2) dum adpropiant super me nocentes ut edant carnes meas qui tribulant me et inimici mei ipsi infirmati sunt et ceciderunt

Psa 27:3 (26:3) si consistant adversus me castra non timebit cor meum si exsurgat adversus me proelium in hoc ego sperabo

Psa 27:4 (26:4) unam petii a Domino hanc requiram ut inhabitem in domo Domini omnes dies vitae meae ut videam voluntatem Domini et visitem templum eius

Psa 27:5 (26:5) quoniam abscondit me in tabernaculo in die malorum protexit me in abscondito tabernaculi sui

Psa 27:6 (26:6) in petra exaltavit me et nunc exaltavit caput meum super inimicos meos circuivi et immolavi in tabernaculo eius hostiam vociferationis cantabo et psalmum dicam Domino

Psa 27:7 (26:7) exaudi Domine vocem meam qua clamavi miserere mei et exaudi me

Psa 27:8 (26:8) tibi dixit cor meum exquisivit facies mea faciem tuam Domine requiram

Psa 27:9 (26:9) ne avertas faciem tuam a me ne declines in ira a servo tuo adiutor meus esto ne derelinquas me neque dispicias me Deus salvator meus

Psa 27:10 (26:10) quoniam pater meus et mater mea dereliquerunt me Dominus autem adsumpsit me

Psa 27:11 (26:11) legem pone mihi Domine in via tua et dirige me in semita recta propter inimicos meos

Psa 27:12 (26:12) ne tradideris me in animas tribulantium me quoniam insurrexerunt in me testes iniqui et mentita est iniquitas sibi

Psa 27:13 (26:13) credo videre bona Domini in terra viventium

Psa 27:14 (26:14) expecta Dominum viriliter age et confortetur cor tuum et sustine Dominum