2Ma 11:1 sed parvo post tempore Lysias procurator regis et propinquus ac negotiorum praepositus graviter ferens de his quae acciderant

2Ma 11:2 congregatis octoginta milibus et equitatu universo veniebat adversus Iudaeos existimans se civitatem quidem captam gentibus habitaculum facturum

2Ma 11:3 templum vero in pecuniae quaestu sicut cetera delubra gentium habiturum et per singulos annos venale sacerdotium

2Ma 11:4 nusquam recogitans Dei potestatem sed mente effrenatus in multitudine peditum et in milibus equitum et in octoginta elefantis confidebat

2Ma 11:5 ingressus autem Iudaeam et adpropians Bethsurae quod erat in angusto loco ab Hierosolyma intervallo quinque stadiorum illud praesidium expugnabat

2Ma 11:6 ut autem Macchabeus et qui cum eo erant cognoverunt expugnari praesidia cum fletu et lacrimis rogabant Dominum et omnis turba simul ut bonum angelum mitteret ad salutem Israhel

2Ma 11:7 et ipse primus Macchabeus sumptis armis ceteros adhortatus est simul secum periculum subire et ferre auxilium fratribus suis

2Ma 11:8 cumque pariter prompto animo procederent Hierosolymis apparuit praecedens eos eques in veste candida armis aureis hastam vibrans

2Ma 11:9 tum simul omnes benedixerunt misericordem Dominum et convaluerunt animis non solum homines sed et bestias ferocissimas et muros ferreos parati penetrare

2Ma 11:10 ibant igitur prompti de caelo habentes adiutorem et miserantem eos Dominum

2Ma 11:11 leonum autem impetu inruentes hostibus prostraverunt ex eis undecim milia peditum et equites mille sescentos

2Ma 11:12 universos autem in fugam verterunt plures vero ex eis vulnerati nudi evaserunt sed et ipse Lysias turpiter fugiens evasit

2Ma 11:13 et quia non insensatus erat secum ipse reputans factam erga se diminutionem et intellegens invictos esse Hebraeos Dei auxilio nitentes misit ad eos

2Ma 11:14 promisitque consensurum se omnibus quae iusta sunt et regem conpulsurum amicum fieri

2Ma 11:15 annuit autem Macchabeus precibus Lysiae in omnibus utilitati consulens et quaecumque Macchabeus scripsit Lysiae de Iudaeis ea rex concessit

2Ma 11:16 nam erant scriptae Iudaeis epistulae a Lysia quidem hunc modum continentes Lysias populo Iudaeorum salutem

2Ma 11:17 Iohannes et Abessalom qui missi sunt a vobis tradentes scripta postulabant ut ea quae per illos significabantur implerem

2Ma 11:18 quaecumque igitur regi potuerunt perferri exposui et quae res permittebat concessit

2Ma 11:19 si igitur in negotiis fidem conservaveritis etiam deinceps honorum vobis causa esse temptabo

2Ma 11:20 de ceteris autem per singula verbo mandavi et istis et his qui a me missi sunt conloqui vobiscum

2Ma 11:21 bene valete anno centesimo quadragesimo octavo dioscori die mensis vicesima et quarta

2Ma 11:22 regis autem epistula ista continebat rex Antiochus Lysiae fratri salutem

2Ma 11:23 patre nostro inter deos translato nos volentes eos qui sunt in regno nostro sine tumultu agere et rebus suis adhibere diligentiam

2Ma 11:24 audivimus Iudaeos non consensisse patri ut transferrentur ad ritum Graecorum sed tenere velle suum institutum ac propterea postulare concedi sibi legitima sua

2Ma 11:25 volentes igitur hanc quoque gentem quietam esse statuentes iudicavimus templum restitui illis ut agerent secundum maiorum suorum consuetudinem

2Ma 11:26 bene igitur feceris si miseris ad eos et dextram dederis ut cognita nostra voluntate bono animo sint et utilitatibus propriis deserviant

2Ma 11:27 ad Iudaeos autem regis epistula talis erat rex Antiochus senatui Iudaeorum et ceteris Iudaeis salutem

2Ma 11:28 si valetis sic estis ut volumus sed et ipsi bene valemus

2Ma 11:29 adiit nos Menelaus dicens velle vos descendere ad vestros qui sunt apud nos

2Ma 11:30 his igitur qui commeant usque ad diem tricesimum mensis xandici damus dextras securitatis

2Ma 11:31 ut Iudaei utantur cibis et legibus suis sicut et prius et nemo eorum ullo modo molestiam patiatur de his quae per ignorantiam gesta sunt

2Ma 11:32 misi autem et Menelaum qui vos adloquatur

2Ma 11:33 valete anno centesimo quadragesimo octavo xandici mensis quintadecima

2Ma 11:34 miserunt autem etiam Romani epistulam ita se habentem Quintus Memmius et Titus Manilius legati Romanorum populo Iudaeorum salutem

2Ma 11:35 de his quae Lysias cognatus regis concessit vobis et nos concessimus

2Ma 11:36 de quibus autem iudicavit referendum confestim aliquem mittite diligentius inter vos conferentes ut decernamus sicut congruit vobis nos enim Antiochiam accedimus

2Ma 11:37 ideoque festinate scribere ut nos quoque sciamus cuius estis voluntatis

2Ma 11:38 bene valete anno centesimo quadragesimo octavo quintadecima die mensis xandici