Rehoboam Secures His Kingdom

2Ch 11:1 venit autem Roboam in Hierusalem et convocavit universam domum Iuda et Beniamin in centum octoginta milibus electorum atque bellantium ut dimicaret contra Israhel et converteret ad se regnum suum

2Ch 11:2 factusque est sermo Domini ad Semeiam hominem Dei dicens

2Ch 11:3 loquere ad Roboam filium Salomonis regem Iuda et ad universum Israhel qui est in Iuda et Beniamin

2Ch 11:4 haec dicit Dominus non ascendetis neque pugnabitis contra fratres vestros revertatur unusquisque in domum suam quia mea hoc gestum est voluntate qui cum audissent sermonem Domini reversi sunt nec perrexerunt contra Hieroboam

2Ch 11:5 habitavit autem Roboam in Hierusalem et aedificavit civitates muratas in Iuda

2Ch 11:6 extruxitque Bethleem et Aetham et Thecue

2Ch 11:7 Bethsur quoque et Soccho et Odollam

2Ch 11:8 necnon Geth et Maresa et Ziph

2Ch 11:9 sed et Aduram et Lachis et Azecha

2Ch 11:10 Saraa quoque et Ahilon et Hebron quae erant in Iuda et Beniamin civitates munitissimas

2Ch 11:11 cumque clausisset eas muris posuit in eis principes ciborumque horrea hoc est olei et vini

2Ch 11:12 sed et in singulis urbibus fecit armamentaria scutorum et hastarum firmavitque eas multa diligentia et imperavit super Iudam et Beniamin

Priests and Levites Come to Jerusalem

2Ch 11:13 sacerdotes autem et Levitae qui erant in universo Israhel venerunt ad eum de cunctis sedibus suis

2Ch 11:14 relinquentes suburbana et possessiones suas et transeuntes ad Iudam et Hierusalem eo quod abiecisset eos Hieroboam et posteri eius ne sacerdotio Domini fungerentur

2Ch 11:15 qui constituit sibi sacerdotes excelsorum et daemonum vitulorumque quos fecerat

2Ch 11:16 sed et de cunctis tribubus Israhel quicumque dederant cor suum ut quaererent Dominum Deum Israhel venerunt Hierusalem ad immolandas victimas Domino Deo patrum suorum

2Ch 11:17 et roboraverunt regnum Iuda et confirmaverunt Roboam filium Salomonis per tres annos ambulaverunt enim in viis David et Salomonis annis tantum tribus

Rehoboam's Family

2Ch 11:18 duxit autem Roboam uxorem Maalath filiam Hierimuth filii David Abiail quoque filiam Heliab filii Isai

2Ch 11:19 quae peperit ei filios Ieus et Somoriam et Zoom

2Ch 11:20 post hanc quoque accepit Maacha filiam Absalom quae peperit ei Abia et Ethai et Ziza et Salumith

2Ch 11:21 amavit autem Roboam Maacha filiam Absalom super omnes uxores suas et concubinas nam uxores decem et octo duxerat concubinasque sexaginta et genuit viginti octo filios et sexaginta filias

2Ch 11:22 constituit vero in capite Abiam filium Maacha ducem super fratres suos ipsum enim regem facere cogitabat

2Ch 11:23 qui sapientior fuit et potentior super omnes filios eius et in cunctis finibus Iuda et Beniamin et in universis civitatibus muratis praebuitque eis escas plurimas et multas petivit uxores