David Anointed King

1Ch 11:1 congregatus est igitur omnis Israhel ad David in Hebron dicens os tuum sumus et caro tua

1Ch 11:2 heri quoque et nudius tertius cum adhuc regnaret Saul tu eras qui educebas et introducebas Israhel tibi enim dixit Dominus Deus tuus tu pasces populum meum Israhel et tu eris princeps super eum

1Ch 11:3 venerunt ergo omnes maiores natu Israhel ad regem in Hebron et iniit David cum eis foedus coram Domino unxeruntque eum regem super Israhel iuxta sermonem Domini quem locutus est in manu Samuhel

David Takes Jerusalem

1Ch 11:4 abiit quoque David et omnis Israhel in Hierusalem haec est Iebus ubi erant Iebusei habitatores terrae

1Ch 11:5 dixeruntque qui habitabant in Iebus ad David non ingredieris huc porro David cepit arcem Sion quae est civitas David

1Ch 11:6 dixitque omnis qui percusserit Iebuseum in primis erit princeps et dux ascendit igitur primus Ioab filius Sarviae et factus est princeps

1Ch 11:7 habitavit autem David in arce et idcirco appellata est civitas David

1Ch 11:8 aedificavitque urbem in circuitu a Mello usque ad gyrum Ioab autem reliqua urbis extruxit

1Ch 11:9 proficiebatque David vadens et crescens et Dominus exercituum erat cum eo

David's Mighty Men

1Ch 11:10 hii principes virorum fortium David qui adiuverunt eum ut rex fieret super omnem Israhel iuxta verbum Domini quod locutus est ad Israhel

1Ch 11:11 et iste numerus robustorum David Iesbaam filius Achamoni princeps inter triginta iste levavit hastam suam super trecentos vulneratos una vice

1Ch 11:12 et post eum Eleazar filius patrui eius Ahoites qui erat inter tres potentes

1Ch 11:13 iste fuit cum David in Aphesdommim quando Philisthim congregati sunt ad locum illum in proelium et erat ager regionis illius plenus hordeo fugeratque populus a facie Philisthinorum

1Ch 11:14 hic stetit in medio agri et defendit eum cumque percussisset Philistheos dedit Dominus salutem magnam populo suo

1Ch 11:15 descenderunt autem tres de triginta principibus ad petram in qua erat David ad speluncam Odollam quando Philisthim fuerant castrametati in valle Raphaim

1Ch 11:16 porro David erat in praesidio et statio Philisthinorum in Bethleem

1Ch 11:17 desideravit igitur David et dixit o si quis daret mihi aquam de cisterna Bethleem quae est in porta

1Ch 11:18 tres ergo isti per media castra Philisthinorum perrexerunt et hauserunt aquam de cisterna Bethleem quae erat in porta et adtulerunt ad David ut biberet qui noluit sed magis libavit illam Domino

1Ch 11:19 dicens absit ut in conspectu Dei mei hoc faciam et sanguinem virorum istorum bibam quia in periculo animarum suarum adtulerunt mihi aquam et ob hanc causam noluit bibere haec fecerunt tres robustissimi

1Ch 11:20 Abisai quoque frater Ioab ipse erat princeps trium et ipse levavit hastam suam contra trecentos vulneratos et ipse erat inter tres nominatissimus

1Ch 11:21 inter tres secundos inclitus et princeps eorum verumtamen usque ad tres primos non pervenerat

1Ch 11:22 Banaia filius Ioiadae viri robustissimi qui multa opera perpetrarat de Capsehel ipse percussit duos Arihel Moab et ipse descendit et interfecit leonem in media cisterna tempore nivis

1Ch 11:23 et ipse percussit virum aegyptium cuius statura erat quinque cubitorum et habebat lanceam ut liciatorium texentium descendit ergo ad eum cum virga et rapuit hastam quam tenebat manu et interfecit eum hasta sua

1Ch 11:24 haec fecit Banaia filius Ioiada qui erat inter tres robustos nominatissimus

1Ch 11:25 inter triginta primus verumtamen ad tres usque non pervenerat posuit autem eum David ad auriculam suam

1Ch 11:26 porro fortissimi in exercitu Asahel frater Ioab et Eleanan filius patrui eius de Bethleem

1Ch 11:27 Semmoth Arorites Helles Phallonites

1Ch 11:28 Iras filius Acces Thecuites Abiezer Anathothites

1Ch 11:29 Sobbochai Asothites Ilai Ahoites

1Ch 11:30 Marai Netophathites Heled filius Baana Netophathites

1Ch 11:31 Ethai filius Ribai de Gabaath filiorum Beniamin Banaia Pharathonites

1Ch 11:32 Uri de torrente Gaas Abial Arabathites Azmoth Bauramites Eliaba Salabonites

1Ch 11:33 filii Asom Gezonites Ionathan filius Sega Ararites

1Ch 11:34 Ahiam filius Sachar Ararites

1Ch 11:35 Eliphal filius Ur

1Ch 11:36 Apher Mechurathites Ahia Phellonites

1Ch 11:37 Asrai Carmelites Noorai filius Azbi

1Ch 11:38 Iohel frater Nathan Mabar filius Agarai

1Ch 11:39 Sellec Ammonites Noorai Berothites armiger Ioab filii Sarviae

1Ch 11:40 Iras Iethreus Gareb Iethreus

1Ch 11:41 Urias Ettheus Zabad filius Ooli

1Ch 11:42 Adina filius Seza Rubenites princeps Rubenitarum et cum eo triginta

1Ch 11:43 Hanan filius Maacha et Iosaphat Mathanites

1Ch 11:44 Ozias Astharothites Semma et Iaihel filii Hotam Aroerites

1Ch 11:45 Iedihel filius Samri et Ioha frater eius Thosaites

1Ch 11:46 Elihel Maumites et Ieribai et Iosaia filii Elnaem et Iethma Moabites

1Ch 11:47 (11:46) Elihel et Obed et Iasihel de Masobia