Allepo, Habakkuk, Chapter 03

Hab 3:1 א תפלה לחבקוק הנביא--על שגינות
Hab 3:2 ב יהוה שמעתי שמעך יראתי--יהוה פעלך בקרב שנים חייהו בקרב שנים תודיע ברגז רחם תזכור
Hab 3:3 ג אלוה מתימן יבוא וקדוש מהר פארן סלה כסה שמים הודו ותהלתו מלאה הארץ
Hab 3:4 ד ונגה כאור תהיה קרנים מידו לו ושם חביון עזה
Hab 3:5 ה לפניו ילך דבר ויצא רשף לרגליו
Hab 3:6 ו עמד וימדד ארץ ראה ויתר גוים ויתפצצו הררי עד שחו גבעות עולם הליכות עולם לו
Hab 3:7 ז תחת און ראיתי אהלי כושן ירגזון יריעות ארץ מדין
Hab 3:8 ח הבנהרים חרה יהוה--אם בנהרים אפך אם בים עברתך  כי תרכב על סוסיך מרכבתיך ישועה
Hab 3:9 ט עריה תעור קשתך שבעות מטות אמר סלה נהרות תבקע ארץ
Hab 3:10 י ראוך יחילו הרים זרם מים עבר נתן תהום קולו רום ידיהו נשא
Hab 3:11 יא שמש ירח עמד זבלה לאור חציך יהלכו לנגה ברק חניתך
Hab 3:12 יב בזעם תצעד ארץ באף תדוש גוים
Hab 3:13 יג יצאת לישע עמך לישע את משיחך מחצת ראש מבית רשע ערות יסוד עד צואר סלה  {פ}
Hab 3:14 יד נקבת במטיו ראש פרזו יסערו להפיצני עליצתם כמו לאכל עני במסתר
Hab 3:15 טו דרכת בים סוסיך חמר מים רבים
Hab 3:16 טז שמעתי ותרגז בטני לקול צללו שפתי--יבוא רקב בעצמי ותחתי ארגז  אשר אנוח ליום צרה לעלות לעם יגודנו
Hab 3:17 יז כי תאנה לא תפרח ואין יבול בגפנים--כחש מעשה זית ושדמות לא עשה אכל גזר ממכלה צאן ואין בקר ברפתים
Hab 3:18 יח ואני ביהוה אעלוזה  אגילה באלהי ישעי
Hab 3:19 יט יהוה אדני חילי וישם רגלי כאילות ועל במותי ידרכני למנצח בנגינותי  {ש}