Allepo, Ezekiel, Chapter 02

Eze 2:1 א ויאמר אלי  בן אדם עמד על רגליך ואדבר אתך
Eze 2:2 ב ותבא בי רוח כאשר דבר אלי ותעמדני על רגלי ואשמע את מדבר אלי  {פ}
Eze 2:3 ג ויאמר אלי בן אדם שולח אני אותך אל בני ישראל--אל גוים המורדים אשר מרדו בי  המה ואבותם פשעו בי עד עצם היום הזה
Eze 2:4 ד והבנים קשי פנים וחזקי לב--אני שולח אותך אליהם ואמרת אליהם כה אמר אדני יהוה
Eze 2:5 ה והמה אם ישמעו ואם יחדלו כי בית מרי המה--וידעו כי נביא היה בתוכם  {פ}
Eze 2:6 ו ואתה בן אדם אל תירא מהם ומדבריהם אל תירא כי סרבים וסלונים אותך ואל עקרבים אתה יושב  מדבריהם אל תירא ומפניהם אל תחת כי בית מרי המה
Eze 2:7 ז ודברת את דברי אליהם אם ישמעו ואם יחדלו  כי מרי המה  {פ}
Eze 2:8 ח ואתה בן אדם שמע את אשר אני מדבר אליך--אל תהי מרי כבית המרי  פצה פיך--ואכל את אשר אני נתן אליך
Eze 2:9 ט ואראה והנה יד שלוחה אלי והנה בו מגלת ספר
Eze 2:10 י ויפרש אותה לפני והיא כתובה פנים ואחור וכתוב אליה קנים והגה והי  {ס}