Jer 6:1 א העזו בני בנימן מקרב ירושלם ובתקוע תקעו שופר ועל בית הכרם שאו משאת  כי רעה נשקפה מצפון ושבר גדול
Jer 6:2 ב הנוה והמענגה דמיתי בת ציון
Jer 6:3 ג אליה יבאו רעים ועדריהם תקעו עליה אהלים סביב רעו איש את ידו
Jer 6:4 ד קדשו עליה מלחמה קומו ונעלה בצהרים אוי לנו כי פנה היום כי ינטו צללי ערב
Jer 6:5 ה קומו ונעלה בלילה ונשחיתה ארמנותיה  {פ}
Jer 6:6 ו כי כה אמר יהוה צבאות כרתו עצה ושפכו על ירושלם סללה היא העיר הפקד כלה עשק בקרבה
Jer 6:7 ז כהקיר בור (ביר) מימיה כן הקרה רעתה חמס ושד ישמע בה על פני תמיד--חלי ומכה
Jer 6:8 ח הוסרי ירושלם--פן תקע נפשי ממך  פן אשימך שממה ארץ לוא נושבה  {פ}
Jer 6:9 ט כה אמר יהוה צבאות עולל יעוללו כגפן שארית ישראל השב ידך כבוצר על סלסלות
Jer 6:10 י על מי אדברה ואעידה וישמעו--הנה ערלה אזנם ולא יוכלו להקשיב הנה דבר יהוה היה להם לחרפה--לא יחפצו בו
Jer 6:11 יא ואת חמת יהוה מלאתי נלאיתי הכיל--שפך על עולל בחוץ ועל סוד בחורים יחדו  כי גם איש עם אשה ילכדו זקן עם מלא ימים
Jer 6:12 יב ונסבו בתיהם לאחרים שדות ונשים יחדו  כי אטה את ידי על ישבי הארץ נאם יהוה
Jer 6:13 יג כי מקטנם ועד גדולם כלו בוצע בצע ומנביא ועד כהן--כלו עשה שקר
Jer 6:14 יד וירפאו את שבר עמי על נקלה--לאמר שלום שלום ואין שלום
Jer 6:15 טו הבישו כי תועבה עשו גם בוש לא יבושו גם הכלים לא ידעו--לכן יפלו בנפלים בעת פקדתים יכשלו אמר יהוה  {ס}
Jer 6:16 טז כה אמר יהוה עמדו על דרכים וראו ושאלו לנתבות עולם אי זה דרך הטוב ולכו בה ומצאו מרגוע לנפשכם ויאמרו לא נלך
Jer 6:17 יז והקמתי עליכם צפים הקשיבו לקול שופר ויאמרו לא נקשיב
Jer 6:18 יח לכן שמעו הגוים ודעי עדה את אשר בם
Jer 6:19 יט שמעי הארץ--הנה אנכי מביא רעה אל העם הזה פרי מחשבותם  כי על דברי לא הקשיבו ותורתי וימאסו בה
Jer 6:20 כ למה זה לי לבונה משבא תבוא וקנה הטוב מארץ מרחק עלותיכם לא לרצון וזבחיכם לא ערבו לי
Jer 6:21 כא לכן כה אמר יהוה הנני נתן אל העם הזה מכשלים וכשלו בם אבות ובנים יחדו שכן ורעו--יאבדו (ואבדו)  {פ}
Jer 6:22 כב כה אמר יהוה הנה עם בא מארץ צפון וגוי גדול יעור מירכתי ארץ
Jer 6:23 כג קשת וכידון יחזיקו אכזרי הוא ולא ירחמו קולם כים יהמה ועל סוסים ירכבו ערוך כאיש למלחמה עליך בת ציון
Jer 6:24 כד שמענו את שמעו רפו ידינו צרה החזקתנו--חיל כיולדה
Jer 6:25 כה אל תצאי (תצאו) השדה ובדרך אל תלכי (תלכו)  כי חרב לאיב מגור מסביב
Jer 6:26 כו בת עמי חגרי שק והתפלשי באפר--אבל יחיד עשי לך מספד תמרורים  כי פתאם יבא השדד עלינו
Jer 6:27 כז בחון נתתיך בעמי מבצר ותדע ובחנת את דרכם
Jer 6:28 כח כלם סרי סוררים הלכי רכיל נחשת וברזל כלם משחיתים המה
Jer 6:29 כט נחר מפח מאשתם (מאש תם) עפרת--לשוא צרף צרוף ורעים לא נתקו
Jer 6:30 ל כסף נמאס קראו להם  כי מאס יהוה בהם  {פ}