Isa 41:1 א החרישו אלי איים ולאמים יחליפו כח יגשו אז ידברו יחדו למשפט נקרבה
Isa 41:2 ב מי העיר ממזרח צדק יקראהו לרגלו יתן לפניו גוים ומלכים ירד--יתן כעפר חרבו כקש נדף קשתו
Isa 41:3 ג ירדפם יעבור שלום ארח ברגליו לא יבוא
Isa 41:4 ד מי פעל ועשה קרא הדרות מראש  אני יהוה ראשון ואת אחרנים אני הוא
Isa 41:5 ה ראו איים ויראו קצות הארץ יחרדו קרבו ויאתיון
Isa 41:6 ו איש את רעהו יעזרו ולאחיו יאמר חזק
Isa 41:7 ז ויחזק חרש את צרף מחליק פטיש את הולם פעם אמר לדבק טוב הוא ויחזקהו במסמרים לא ימוט  {ס}
Isa 41:8 ח ואתה ישראל עבדי יעקב אשר בחרתיך זרע אברהם אהבי
Isa 41:9 ט אשר החזקתיך מקצות הארץ ומאציליה קראתיך ואמר לך עבדי אתה בחרתיך ולא מאסתיך
Isa 41:10 י אל תירא כי עמך אני אל תשתע כי אני אלהיך אמצתיך אף עזרתיך--אף תמכתיך בימין צדקי
Isa 41:11 יא הן יבשו ויכלמו כל הנחרים בך יהיו כאין ויאבדו אנשי ריבך
Isa 41:12 יב תבקשם ולא תמצאם אנשי מצתך יהיו כאין וכאפס אנשי מלחמתך
Isa 41:13 יג כי אני יהוה אלהיך--מחזיק ימינך האמר לך אל תירא אני עזרתיך  {ס}
Isa 41:14 יד אל תיראי תולעת יעקב מתי ישראל אני עזרתיך נאם יהוה וגאלך קדוש ישראל
Isa 41:15 טו הנה שמתיך למורג חרוץ חדש--בעל פיפיות תדוש הרים ותדק וגבעות כמץ תשים
Isa 41:16 טז תזרם ורוח תשאם וסערה תפיץ אותם ואתה תגיל ביהוה בקדוש ישראל תתהלל  {ס}
Isa 41:17 יז העניים והאביונים מבקשים מים ואין--לשונם בצמא נשתה אני יהוה אענם אלהי ישראל לא אעזבם
Isa 41:18 יח אפתח על שפיים נהרות ובתוך בקעות מעינות אשים מדבר לאגם מים וארץ ציה למוצאי מים
Isa 41:19 יט אתן במדבר ארז שטה והדס ועץ שמן אשים בערבה ברוש תדהר ותאשור--יחדו
Isa 41:20 כ למען יראו וידעו וישימו וישכילו יחדו--כי יד יהוה עשתה זאת וקדוש ישראל בראה  {פ}
Isa 41:21 כא קרבו ריבכם יאמר יהוה הגישו עצמותיכם יאמר מלך יעקב
Isa 41:22 כב יגישו ויגידו לנו את אשר תקרינה הראשנות מה הנה הגידו ונשימה לבנו ונדעה אחריתן או הבאות השמיענו
Isa 41:23 כג הגידו האתיות לאחור ונדעה כי אלהים אתם אף תיטיבו ותרעו ונשתעה ונרא (ונראה) יחדו
Isa 41:24 כד הן אתם מאין ופעלכם מאפע תועבה יבחר בכם  {פ}
Isa 41:25 כה העירותי מצפון ויאת ממזרח שמש יקרא בשמי ויבא סגנים כמו חמר וכמו יוצר ירמס טיט
Isa 41:26 כו מי הגיד מראש ונדעה ומלפנים ונאמר צדיק אף אין מגיד אף אין משמיע--אף אין שמע אמריכם
Isa 41:27 כז ראשון לציון הנה הנם ולירושלם מבשר אתן
Isa 41:28 כח וארא ואין איש ומאלה ואין יועץ ואשאלם וישיבו דבר
Isa 41:29 כט הן כלם און אפס מעשיהם רוח ותהו נסכיהם  {פ}