Gen 36:1 א ואלה תלדות עשו הוא אדום
Gen 36:2 ב עשו לקח את נשיו מבנות כנען  את עדה בת אילון החתי ואת אהליבמה בת ענה בת צבעון החוי
Gen 36:3 ג ואת בשמת בת ישמעאל אחות נביות
Gen 36:4 ד ותלד עדה לעשו את אליפז ובשמת ילדה את רעואל
Gen 36:5 ה ואהליבמה ילדה את יעיש (יעוש) ואת יעלם ואת קרח אלה בני עשו אשר ילדו לו בארץ כנען
Gen 36:6 ו ויקח עשו את נשיו ואת בניו ואת בנתיו ואת כל נפשות ביתו ואת מקנהו ואת כל בהמתו ואת כל קנינו אשר רכש בארץ כנען וילך אל ארץ מפני יעקב אחיו
Gen 36:7 ז כי היה רכושם רב משבת יחדו ולא יכלה ארץ מגוריהם לשאת אתם--מפני מקניהם
Gen 36:8 ח וישב עשו בהר שעיר עשו הוא אדום
Gen 36:9 ט ואלה תלדות עשו אבי אדום בהר שעיר
Gen 36:10 י אלה שמות בני עשו  אליפז בן עדה אשת עשו רעואל בן בשמת אשת עשו
Gen 36:11 יא ויהיו בני אליפז--תימן אומר צפו וגעתם וקנז
Gen 36:12 יב ותמנע היתה פילגש לאליפז בן עשו ותלד לאליפז את עמלק אלה בני עדה אשת עשו
Gen 36:13 יג ואלה בני רעואל נחת וזרח שמה ומזה אלה היו בני בשמת אשת עשו
Gen 36:14 יד ואלה היו בני אהליבמה בת ענה בת צבעון--אשת עשו ותלד לעשו את יעיש (יעוש) ואת יעלם ואת קרח
Gen 36:15 טו אלה אלופי בני עשו  בני אליפז בכור עשו--אלוף תימן אלוף אומר אלוף צפו אלוף קנז
Gen 36:16 טז אלוף קרח אלוף געתם אלוף עמלק אלה אלופי אליפז בארץ אדום אלה בני עדה
Gen 36:17 יז ואלה בני רעואל בן עשו--אלוף נחת אלוף זרח אלוף שמה אלוף מזה אלה אלופי רעואל בארץ אדום--אלה בני בשמת אשת עשו
Gen 36:18 יח ואלה בני אהליבמה אשת עשו--אלוף יעוש אלוף יעלם אלוף קרח אלה אלופי אהליבמה בת ענה--אשת עשו
Gen 36:19 יט אלה בני עשו ואלה אלופיהם הוא אדום  {ס}
Gen 36:20 כ אלה בני שעיר החרי ישבי הארץ  לוטן ושובל וצבעון וענה
Gen 36:21 כא ודשון ואצר ודישן אלה אלופי החרי בני שעיר בארץ אדום
Gen 36:22 כב ויהיו בני לוטן חרי והימם ואחות לוטן תמנע
Gen 36:23 כג ואלה בני שובל עלון ומנחת ועיבל שפו ואונם
Gen 36:24 כד ואלה בני צבעון ואיה וענה הוא ענה אשר מצא את הימם במדבר ברעתו את החמרים לצבעון אביו
Gen 36:25 כה ואלה בני ענה דשן ואהליבמה בת ענה
Gen 36:26 כו ואלה בני דישן--חמדן ואשבן ויתרן וכרן
Gen 36:27 כז אלה בני אצר--בלהן וזעון ועקן
Gen 36:28 כח אלה בני דישן עוץ וארן
Gen 36:29 כט אלה אלופי החרי  אלוף לוטן אלוף שובל אלוף צבעון אלוף ענה
Gen 36:30 ל אלוף דשן אלוף אצר אלוף דישן אלה אלופי החרי לאלפיהם בארץ שעיר  {פ}
Gen 36:31 לא ואלה המלכים אשר מלכו בארץ אדום--לפני מלך מלך לבני ישראל
Gen 36:32 לב וימלך באדום בלע בן בעור ושם עירו דנהבה
Gen 36:33 לג וימת בלע וימלך תחתיו יובב בן זרח מבצרה
Gen 36:34 לד וימת יובב וימלך תחתיו חשם מארץ התימני
Gen 36:35 לה וימת חשם וימלך תחתיו הדד בן בדד המכה את מדין בשדה מואב ושם עירו עוית
Gen 36:36 לו וימת הדד וימלך תחתיו שמלה ממשרקה
Gen 36:37 לז וימת שמלה וימלך תחתיו שאול מרחבות הנהר
Gen 36:38 לח וימת שאול וימלך תחתיו בעל חנן בן עכבור
Gen 36:39 לט וימת בעל חנן בן עכבור וימלך תחתיו הדר ושם עירו פעו ושם אשתו מהיטבאל בת מטרד בת מי זהב
Gen 36:40 מ ואלה שמות אלופי עשו למשפחתם למקמתם בשמתם  אלוף תמנע אלוף עלוה אלוף יתת
Gen 36:41 מא אלוף אהליבמה אלוף אלה אלוף פינן
Gen 36:42 מב אלוף קנז אלוף תימן אלוף מבצר
Gen 36:43 מג אלוף מגדיאל אלוף עירם אלה אלופי אדום למשבתם בארץ אחזתם--הוא עשו אבי אדום  {פ}