Isa 38:1 א בימים ההם חלה חזקיהו למות ויבוא אליו ישעיהו בן אמוץ הנביא ויאמר אליו כה אמר יהוה צו לביתך--כי מת אתה ולא תחיה
Isa 38:2 ב ויסב חזקיהו פניו אל הקיר ויתפלל אל יהוה
Isa 38:3 ג ויאמר אנה יהוה זכר נא את אשר התהלכתי לפניך באמת ובלב שלם והטוב בעיניך עשיתי ויבך חזקיהו בכי גדול  {ס}
Isa 38:4 ד ויהי דבר יהוה אל ישעיהו לאמר
Isa 38:5 ה הלוך ואמרת אל חזקיהו כה אמר יהוה אלהי דוד אביך שמעתי את תפלתך ראיתי את דמעתך הנני יוסף על ימיך חמש עשרה שנה
Isa 38:6 ו ומכף מלך אשור אצילך ואת העיר הזאת וגנותי על העיר הזאת
Isa 38:7 ז וזה לך האות מאת יהוה אשר יעשה יהוה את הדבר הזה אשר דבר
Isa 38:8 ח הנני משיב את צל המעלות אשר ירדה במעלות אחז בשמש אחרנית--עשר מעלות ותשב השמש עשר מעלות במעלות אשר ירדה  {ס}
Isa 38:9 ט מכתב לחזקיהו מלך יהודה בחלתו ויחי מחליו
Isa 38:10 י אני אמרתי בדמי ימי אלכה--בשערי שאול פקדתי יתר שנותי
Isa 38:11 יא אמרתי לא אראה יה יה בארץ החיים לא אביט אדם עוד עם יושבי חדל
Isa 38:12 יב דורי נסע ונגלה מני--כאהל רעי קפדתי כארג חיי מדלה יבצעני מיום עד לילה תשלימני
Isa 38:13 יג שויתי עד בקר כארי כן ישבר כל עצמותי מיום עד לילה תשלימני
Isa 38:14 יד כסוס עגור כן אצפצף אהגה כיונה דלו עיני למרום אדני עשקה לי ערבני
Isa 38:15 טו מה אדבר ואמר לי והוא עשה אדדה כל שנותי על מר נפשי
Isa 38:16 טז אדני עליהם יחיו ולכל בהן חיי רוחי ותחלימני והחיני
Isa 38:17 יז הנה לשלום מר לי מר ואתה חשקת נפשי משחת בלי כי השלכת אחרי גוך כל חטאי
Isa 38:18 יח כי לא שאול תודך מות יהללך לא ישברו יורדי בור אל אמתך
Isa 38:19 יט חי חי הוא יודך כמוני היום אב לבנים יודיע אל אמתך
Isa 38:20 כ יהוה להושיעני ונגנותי ננגן כל ימי חיינו על בית יהוה
Isa 38:21 כא ויאמר ישעיהו ישאו דבלת תאנים וימרחו על השחין ויחי
Isa 38:22 כב ויאמר חזקיהו מה אות  כי אעלה בית יהוה  {ס}