Allepo, Isaiah, Chapter 26

Isa 26:1 א ביום ההוא יושר השיר הזה בארץ יהודה עיר עז לנו ישועה ישית חומות וחל
Isa 26:2 ב פתחו שערים ויבא גוי צדיק שמר אמנים
Isa 26:3 ג יצר סמוך תצר שלום שלום  כי בך בטוח
Isa 26:4 ד בטחו ביהוה עדי עד  כי ביה יהוה צור עולמים
Isa 26:5 ה כי השח ישבי מרום קריה נשגבה ישפילנה ישפילה עד ארץ יגיענה עד עפר
Isa 26:6 ו תרמסנה רגל רגלי עני פעמי דלים
Isa 26:7 ז ארח לצדיק מישרים  ישר מעגל צדיק תפלס
Isa 26:8 ח אף ארח משפטיך יהוה קוינוך--לשמך ולזכרך תאות נפש
Isa 26:9 ט נפשי אויתך בלילה אף רוחי בקרבי אשחרך  כי כאשר משפטיך לארץ--צדק למדו ישבי תבל
Isa 26:10 י יחן רשע בל למד צדק בארץ נכחות יעול ובל יראה גאות יהוה  {פ}
Isa 26:11 יא יהוה רמה ידך בל יחזיון  יחזו ויבשו קנאת עם אף אש צריך תאכלם  {ס}
Isa 26:12 יב יהוה תשפת שלום לנו  כי גם כל מעשינו פעלת לנו  {ס}
Isa 26:13 יג יהוה אלהינו בעלונו אדנים זולתך לבד בך נזכיר שמך
Isa 26:14 יד מתים בל יחיו--רפאים בל יקמו לכן פקדת ותשמידם ותאבד כל זכר למו
Isa 26:15 טו יספת לגוי יהוה יספת לגוי נכבדת רחקת כל קצוי ארץ  {פ}
Isa 26:16 טז יהוה בצר פקדוך צקון לחש מוסרך למו
Isa 26:17 יז כמו הרה תקריב ללדת תחיל תזעק בחבליה--כן היינו מפניך יהוה
Isa 26:18 יח הרינו חלנו כמו ילדנו רוח ישועת בל נעשה ארץ ובל יפלו ישבי תבל
Isa 26:19 יט יחיו מתיך נבלתי יקומון הקיצו ורננו שכני עפר כי טל אורת טלך וארץ רפאים תפיל  {פ}
Isa 26:20 כ לך עמי בא בחדריך וסגר דלתיך (דלתך) בעדך חבי כמעט רגע עד יעבור (יעבר) זעם
Isa 26:21 כא כי הנה יהוה יצא ממקומו לפקד עון ישב הארץ עליו וגלתה הארץ את דמיה ולא תכסה עוד על הרוגיה  {פ}