Isa 1:1 א חזון ישעיהו בן אמוץ אשר חזה על יהודה וירושלם--בימי עזיהו יותם אחז יחזקיהו מלכי יהודה
Isa 1:2 ב שמעו שמים והאזיני ארץ כי יהוה דבר  בנים גדלתי ורוממתי והם פשעו בי
Isa 1:3 ג ידע שור קנהו וחמור אבוס בעליו ישראל לא ידע עמי לא התבונן
Isa 1:4 ד הוי גוי חטא עם כבד עון--זרע מרעים בנים משחיתים עזבו את יהוה נאצו את קדוש ישראל--נזרו אחור
Isa 1:5 ה על מה תכו עוד תוסיפו סרה כל ראש לחלי וכל לבב דוי
Isa 1:6 ו מכף רגל ועד ראש אין בו מתם פצע וחבורה ומכה טריה לא זרו ולא חבשו ולא רככה בשמן
Isa 1:7 ז ארצכם שממה עריכם שרפות אש אדמתכם לנגדכם זרים אכלים אתה ושממה כמהפכת זרים
Isa 1:8 ח ונותרה בת ציון כסכה בכרם כמלונה במקשה כעיר נצורה
Isa 1:9 ט לולי יהוה צבאות הותיר לנו שריד כמעט--כסדם היינו לעמרה דמינו  {פ}
Isa 1:10 י שמעו דבר יהוה קציני סדם האזינו תורת אלהינו עם עמרה
Isa 1:11 יא למה לי רב זבחיכם יאמר יהוה שבעתי עלות אילים וחלב מריאים ודם פרים וכבשים ועתודים לא חפצתי
Isa 1:12 יב כי תבאו לראות פני--מי בקש זאת מידכם רמס חצרי
Isa 1:13 יג לא תוסיפו הביא מנחת שוא--קטרת תועבה היא לי חדש ושבת קרא מקרא לא אוכל און ועצרה
Isa 1:14 יד חדשיכם ומועדיכם שנאה נפשי היו עלי לטרח נלאיתי נשא
Isa 1:15 טו ובפרשכם כפיכם אעלים עיני מכם--גם כי תרבו תפלה אינני שמע  ידיכם דמים מלאו
Isa 1:16 טז רחצו הזכו--הסירו רע מעלליכם מנגד עיני  חדלו הרע
Isa 1:17 יז למדו היטב דרשו משפט אשרו חמוץ שפטו יתום ריבו אלמנה  {ס}
Isa 1:18 יח לכו נא ונוכחה יאמר יהוה אם יהיו חטאיכם כשנים כשלג ילבינו אם יאדימו כתולע כצמר יהיו
Isa 1:19 יט אם תאבו ושמעתם--טוב הארץ תאכלו
Isa 1:20 כ ואם תמאנו ומריתם--חרב תאכלו כי פי יהוה דבר  {פ}
Isa 1:21 כא איכה היתה לזונה קריה נאמנה מלאתי משפט צדק ילין בה--ועתה מרצחים
Isa 1:22 כב כספך היה לסיגים סבאך מהול במים
Isa 1:23 כג שריך סוררים וחברי גנבים--כלו אהב שחד ורדף שלמנים יתום לא ישפטו וריב אלמנה לא יבוא אליהם  {ס}
Isa 1:24 כד לכן נאם האדון יהוה צבאות--אביר ישראל  הוי אנחם מצרי ואנקמה מאויבי
Isa 1:25 כה ואשיבה ידי עליך ואצרף כבר סיגיך ואסירה כל בדיליך
Isa 1:26 כו ואשיבה שפטיך כבראשנה ויעציך כבתחלה אחרי כן יקרא לך עיר הצדק--קריה נאמנה
Isa 1:27 כז ציון במשפט תפדה ושביה בצדקה
Isa 1:28 כח ושבר פשעים וחטאים יחדו ועזבי יהוה יכלו
Isa 1:29 כט כי יבשו מאילים אשר חמדתם ותחפרו--מהגנות אשר בחרתם
Isa 1:30 ל כי תהיו כאלה נבלת עלה וכגנה אשר מים אין לה
Isa 1:31 לא והיה החסן לנערת ופעלו לניצוץ ובערו שניהם יחדו ואין מכבה  {פ}