Pro 24:1 א  אל-תקנא באנשי רעה    ואל-תתאו להיות אתם
Pro 24:2 ב  כי-שד יהגה לבם    ועמל שפתיהם תדברנה
Pro 24:3 ג  בחכמה יבנה בית    ובתבונה יתכונן
Pro 24:4 ד  ובדעת חדרים ימלאו--    כל-הון יקר ונעים
Pro 24:5 ה  גבר-חכם בעוז    ואיש-דעת מאמץ-כח
Pro 24:6 ו  כי בתחבלות תעשה-לך מלחמה    ותשועה ברב יועץ
Pro 24:7 ז  ראמות לאויל חכמות    בשער לא יפתח-פיהו
Pro 24:8 ח  מחשב להרע--    לו בעל-מזמות יקראו
Pro 24:9 ט  זמת אולת חטאת    ותועבת לאדם לץ
Pro 24:10 י  התרפית ביום צרה--    צר כחכה
Pro 24:11 יא  הצל לקחים למות    ומטים להרג אם-תחשוך
Pro 24:12 יב  כי-תאמר--    הן לא-ידענו-זה הלא-תכן לבות הוא-יבין ונצר נפשך הוא ידע    והשיב לאדם כפעלו
Pro 24:13 יג  אכל-בני דבש כי-טוב    ונפת מתוק על-חכך
Pro 24:14 יד  כן דעה חכמה--לנפשך    אם-מצאת ויש אחרית ותקותך לא תכרת
Pro 24:15 טו  אל-תארב רשע לנוה צדיק    אל-תשדד רבצו
Pro 24:16 טז  כי שבע יפול צדיק וקם    ורשעים יכשלו ברעה
Pro 24:17 יז  בנפל אויביך (אויבך) אל-תשמח    ובכשלו אל-יגל לבך
Pro 24:18 יח  פן-יראה יהוה ורע בעיניו    והשיב מעליו אפו
Pro 24:19 יט  אל-תתחר במרעים    אל-תקנא ברשעים
Pro 24:20 כ  כי לא-תהיה אחרית לרע    נר רשעים ידעך
Pro 24:21 כא  ירא-את-יהוה בני ומלך    עם-שונים אל-תתערב
Pro 24:22 כב  כי-פתאם יקום אידם    ופיד שניהם מי יודע
Pro 24:23 כג  גם-אלה לחכמים    הכר-פנים במשפט בל-טוב
Pro 24:24 כד  אמר לרשע--צדיק אתה    יקבהו עמים יזעמוהו לאמים
Pro 24:25 כה  ולמוכיחים ינעם    ועליהם תבוא ברכת-טוב
Pro 24:26 כו  שפתים ישק    משיב דברים נכחים
Pro 24:27 כז  הכן בחוץ מלאכתך--ועתדה בשדה לך    אחר ובנית ביתך
Pro 24:28 כח  אל-תהי עד-חנם ברעך    והפתית בשפתיך
Pro 24:29 כט  אל-תאמר--כאשר עשה-לי כן אעשה-לו    אשיב לאיש כפעלו
Pro 24:30 ל  על-שדה איש-עצל עברתי    ועל-כרם אדם חסר-לב
Pro 24:31 לא  והנה עלה כלו קמשנים--כסו פניו חרלים    וגדר אבניו נהרסה
Pro 24:32 לב  ואחזה אנכי אשית לבי    ראיתי לקחתי מוסר
Pro 24:33 לג  מעט שנות מעט תנומות    מעט חבק ידים לשכב
Pro 24:34 לד  ובא-מתהלך רישך    ומחסריך כאיש מגן