Pro 21:1 א  פלגי-מים לב-מלך ביד-יהוה    על-כל-אשר יחפץ יטנו
Pro 21:2 ב  כל-דרך-איש ישר בעיניו    ותכן לבות יהוה
Pro 21:3 ג  עשה צדקה ומשפט--    נבחר ליהוה מזבח
Pro 21:4 ד  רום-עינים ורחב-לב--    נר רשעים חטאת
Pro 21:5 ה  מחשבות חרוץ אך-למותר    וכל-אץ אך-למחסור
Pro 21:6 ו  פעל אצרות בלשון שקר--    הבל נדף מבקשי-מות
Pro 21:7 ז  שד-רשעים יגורם    כי מאנו לעשות משפט
Pro 21:8 ח  הפכפך דרך איש וזר    וזך ישר פעלו
Pro 21:9 ט  טוב לשבת על-פנת-גג--    מאשת מדינים ובית חבר
Pro 21:10 י  נפש רשע אותה-רע    לא-יחן בעיניו רעהו
Pro 21:11 יא  בענש-לץ יחכם-פתי    ובהשכיל לחכם יקח-דעת
Pro 21:12 יב  משכיל צדיק לבית רשע    מסלף רשעים לרע
Pro 21:13 יג  אטם אזנו מזעקת-דל--    גם-הוא יקרא ולא יענה
Pro 21:14 יד  מתן בסתר יכפה-אף    ושחד בחק חמה עזה
Pro 21:15 טו  שמחה לצדיק עשות משפט    ומחתה לפעלי און
Pro 21:16 טז  אדם--תועה מדרך השכל    בקהל רפאים ינוח
Pro 21:17 יז  איש מחסור אהב שמחה    אהב יין-ושמן לא יעשיר
Pro 21:18 יח  כפר לצדיק רשע    ותחת ישרים בוגד
Pro 21:19 יט  טוב שבת בארץ-מדבר--    מאשת מדונים (מדינים) וכעס
Pro 21:20 כ  אוצר נחמד ושמן--בנוה חכם    וכסיל אדם יבלענו
Pro 21:21 כא  רדף צדקה וחסד--    ימצא חיים צדקה וכבוד
Pro 21:22 כב  עיר גברים עלה חכם    וירד עז מבטחה
Pro 21:23 כג  שמר פיו ולשונו--    שמר מצרות נפשו
Pro 21:24 כד  זד יהיר לץ שמו--    עושה בעברת זדון
Pro 21:25 כה  תאות עצל תמיתנו    כי-מאנו ידיו לעשות
Pro 21:26 כו  כל-היום התאוה תאוה    וצדיק יתן ולא יחשך
Pro 21:27 כז  זבח רשעים תועבה    אף כי-בזמה יביאנו
Pro 21:28 כח  עד-כזבים יאבד    ואיש שומע לנצח ידבר
Pro 21:29 כט  העז איש רשע בפניו    וישר הוא יכין דרכיו (יבין דרכו)
Pro 21:30 ל  אין חכמה ואין תבונה--    ואין עצה לנגד יהוה
Pro 21:31 לא  סוס--מוכן ליום מלחמה    וליהוה התשועה