Pro 19:1 א  טוב-רש הולך בתמו--    מעקש שפתיו והוא כסיל
Pro 19:2 ב  גם בלא-דעת נפש לא-טוב    ואץ ברגלים חוטא
Pro 19:3 ג  אולת אדם תסלף דרכו    ועל-יהוה יזעף לבו
Pro 19:4 ד  הון--יסיף רעים רבים    ודל מרעהו יפרד
Pro 19:5 ה  עד שקרים לא ינקה    ויפיח כזבים לא ימלט
Pro 19:6 ו  רבים יחלו פני-נדיב    וכל-הרע לאיש מתן
Pro 19:7 ז  כל אחי-רש שנאהו--    אף כי מרעהו רחקו ממנו מרדף אמרים    לא- (לו-) המה
Pro 19:8 ח  קנה-לב אהב נפשו    שמר תבונה למצא-טוב
Pro 19:9 ט  עד שקרים לא ינקה    ויפיח כזבים יאבד
Pro 19:10 י  לא-נאוה לכסיל תענוג    אף כי-לעבד משל בשרים
Pro 19:11 יא  שכל אדם האריך אפו    ותפארתו עבר על-פשע
Pro 19:12 יב  נהם ככפיר זעף מלך    וכטל על-עשב רצונו
Pro 19:13 יג  הות לאביו בן כסיל    ודלף טרד מדיני אשה
Pro 19:14 יד  בית והון נחלת אבות    ומיהוה אשה משכלת
Pro 19:15 טו  עצלה תפיל תרדמה    ונפש רמיה תרעב
Pro 19:16 טז  שמר מצוה שמר נפשו    בוזה דרכיו יומת (ימות)
Pro 19:17 יז  מלוה יהוה חונן דל    וגמלו ישלם-לו
Pro 19:18 יח  יסר בנך כי-יש תקוה    ואל-המיתו אל-תשא נפשך
Pro 19:19 יט  גרל- (גדל-) חמה נשא ענש    כי אם-תציל ועוד תוסף
Pro 19:20 כ  שמע עצה וקבל מוסר--    למען תחכם באחריתך
Pro 19:21 כא  רבות מחשבות בלב-איש    ועצת יהוה היא תקום
Pro 19:22 כב  תאות אדם חסדו    וטוב-רש מאיש כזב
Pro 19:23 כג  יראת יהוה לחיים    ושבע ילין בל-יפקד רע
Pro 19:24 כד  טמן עצל ידו בצלחת    גם-אל-פיהו לא ישיבנה
Pro 19:25 כה  לץ תכה ופתי יערם    והוכיח לנבון יבין דעת
Pro 19:26 כו  משדד-אב יבריח אם--    בן מביש ומחפיר
Pro 19:27 כז  חדל-בני לשמע מוסר    לשגות מאמרי-דעת
Pro 19:28 כח  עד בליעל יליץ משפט    ופי רשעים יבלע-און
Pro 19:29 כט  נכונו ללצים שפטים    ומהלמות לגו כסילים