Pro 14:1 א  חכמות נשים בנתה ביתה    ואולת בידיה תהרסנו
Pro 14:2 ב  הולך בישרו ירא יהוה    ונלוז דרכיו בוזהו
Pro 14:3 ג  בפי-אויל חטר גאוה    ושפתי חכמים תשמורם
Pro 14:4 ד  באין אלפים אבוס בר    ורב-תבואות בכח שור
Pro 14:5 ה  עד אמונים לא יכזב    ויפיח כזבים עד שקר
Pro 14:6 ו  בקש-לץ חכמה ואין    ודעת לנבון נקל
Pro 14:7 ז  לך מנגד לאיש כסיל    ובל-ידעת שפתי-דעת
Pro 14:8 ח  חכמת ערום הבין דרכו    ואולת כסילים מרמה
Pro 14:9 ט  אולים יליץ אשם    ובין ישרים רצון
Pro 14:10 י  לב--יודע מרת נפשו    ובשמחתו לא-יתערב זר
Pro 14:11 יא  בית רשעים ישמד    ואהל ישרים יפריח
Pro 14:12 יב  יש דרך ישר לפני-איש    ואחריתה דרכי-מות
Pro 14:13 יג  גם-בשחק יכאב-לב    ואחריתה שמחה תוגה
Pro 14:14 יד  מדרכיו ישבע סוג לב    ומעליו איש טוב
Pro 14:15 טו  פתי יאמין לכל-דבר    וערום יבין לאשרו
Pro 14:16 טז  חכם ירא וסר מרע    וכסיל מתעבר ובוטח
Pro 14:17 יז  קצר-אפים יעשה אולת    ואיש מזמות ישנא
Pro 14:18 יח  נחלו פתאים אולת    וערומים יכתרו דעת
Pro 14:19 יט  שחו רעים לפני טובים    ורשעים על-שערי צדיק
Pro 14:20 כ  גם-לרעהו ישנא רש    ואהבי עשיר רבים
Pro 14:21 כא  בז-לרעהו חוטא    ומחונן עניים (ענוים) אשריו
Pro 14:22 כב  הלוא-יתעו חרשי רע    וחסד ואמת חרשי טוב
Pro 14:23 כג  בכל-עצב יהיה מותר    ודבר-שפתים אך-למחסור
Pro 14:24 כד  עטרת חכמים עשרם    אולת כסילים אולת
Pro 14:25 כה  מציל נפשות עד אמת    ויפח כזבים מרמה
Pro 14:26 כו  ביראת יהוה מבטח-עז    ולבניו יהיה מחסה
Pro 14:27 כז  יראת יהוה מקור חיים--    לסור ממקשי מות
Pro 14:28 כח  ברב-עם הדרת-מלך    ובאפס לאם מחתת רזון
Pro 14:29 כט  ארך אפים רב-תבונה    וקצר-רוח מרים אולת
Pro 14:30 ל  חיי בשרים לב מרפא    ורקב עצמות קנאה
Pro 14:31 לא  עשק דל חרף עשהו    ומכבדו חנן אביון
Pro 14:32 לב  ברעתו ידחה רשע    וחסה במותו צדיק
Pro 14:33 לג  בלב נבון תנוח חכמה    ובקרב כסילים תודע
Pro 14:34 לד  צדקה תרומם-גוי    וחסד לאמים חטאת
Pro 14:35 לה  רצון-מלך לעבד משכיל    ועברתו תהיה מביש